VOV4.Êđê- Klei hưn mơ̆ng Anôk bruă gĭt gai hdră gang mkhư̆ klei ruă Covid 19 čar Dak Lak hlăm hruê 27/7, alŭ wăl anei čih yap lŏ mâo 13 čô djŏ kman Sar CoV2, 3 čô hlao dưi kbiă leh mơ̆ng sang êa drao. Hlăm ênoh 13 čô djŏ kman Sar CoV2, mâo 5 čô hmao ƀuh hlăm êpul êya, djŏ tuôm kơ mnuih ruă mrâo wĭt mơ̆ng ƀuôn prŏng Hồ Chí Minh, čar Bình Dương lehanăn čar Long An. 8 čô adôk tưp mơ̆ng anôk bluh mâo klei ruă dưi hưn mthâo leh êlâo kơnăn. Klei năng mđing, hlăm 8 čô ruă anei mâo 3 čô djŏ tuôm kơ pô ruă mrô 95008. Anei jing anôk bluh mâo klei ruă ti ƀuôn Khŏa, să Čư̆ Pui, kdriêk Krông Bông. Snăn, tĭng truh 5h hruê 27/7, čar Dak Lak mâo 141 čô ruă, 7 čô dưi kbiă mơ̆ng sang êa drao, ka mâo mnuih ruă djiê ôh. Hlăm ênoh 134 čô ruă dôk dŏng mdrao mâo 8 čô dôk kjham mâo phung nai aê mdrao jih ai tiê dŏng mdrao djŏ hdră.

Klei mrâo mơ̆ng êpul gĭt gai bruă gang mkhư̆ klei ruă tưp Covid-19 ƀuôn prŏng Ƀuôn Ama Thuôt čar Dak Lak tlam mbruê 27/7, brei thâo, sang êa drao prŏng ƀuôn prŏng Ƀuôn Ama Thuôt mdei klei ngă bruă lehanăn čuăl krĭng kyua djŏ tuôm hŏng sa čô hlăm ksiêm mkă kman hmar ƀuh mâo kman Sars CoV 2. Klă klơ̆ng, hruê 26/7, sang êa drao prŏng Ƀuôn Ama Thuôt mâo sa čô mâo klei ruă kŏ lehanăn nao mdrao ti Khoa nội. truh kơ aguah mbruê, leh ngă bruă ksiêm mkă, ƀuh mâo klei đing kơ pô anei, aê mdrao ngă leh klei ksiêm mkă hmar pô anei hŏng kman Sars CoV 2 lehanăn ƀuh pô anei mâo kman Sars CoV 2. Leh kơ anăn mtam, sang êa drao mơĭt leh mta ksiêm mkă anei kơ anôk bruă ksiêm dlăng klei ruă tưp čiăng ngă klei ksiêm mkă RT-PCR. Sang êa drao mdei leh klei ngă bruă mdrao mgŭn lehanăn ngă klei čuăl krĭng khoa nội čiăng đru kơ bruă ksiêm duah lehanăn gang mkhư̆ klei ruă tưp Covid-19.

Ti anăp klei mâo dleh dưi ksiêm dlăng mơ̆ng klei ruă Covid 19 ti alŭ wăl, Anôk bruă sang čư̆ êa ƀuôn prŏng Ƀuôn Ama Thuôt, čar Dak Lak pŏk leh hdră mbha hră dưi nao sang mnia mblei mnơ̆ng kơ mnuih ƀuôn sang kñăm rơ̆ng kjăp hdră gang mkhư̆ klei ruă tưp. Hluê anăn, bruă nao sang mnia hluê hră dưi mbha dưi pŏk ngă mơ̆ng hruê 29/7. Anôk bruă sang čư̆ êa ƀuôn prŏng Ƀuôn Ama Thuôt gĭt gai leh Anôk bruă sang čư̆ êa dŭm să, ƀuôn hgŭm hluê ngă hdră mbha hră dưi nao sang mnia, siêu thị, anôk blei mnơ̆ng ƀơ̆ng huă kơ mnuih ƀuôn sang hŏng hnơ̆ng dưi nao 3 hruê 1 blư̆, bi mlih tuôr plah wah dŭm gŏ sang. Mnuih ƀuôn sang hưn mthâo hlăm hră mbha êlâo kơ nao mŭt hlăm sang mnia lehanăn rŏng anăn hlei pô dưi čih hlăm hră knŏng pô anăn dưi nao sang mnia amâo dưi brei pô mkăn nao ôh. Hră nao sang mnia dưi ba yua 1 blư̆ ti 1 sang mnia hlăm alŭ wăl. Anôk bruă sang čư̆ êa dŭm să, ƀuôn hgŭm mbha êpul dôk gak răng ti ƀăng jang nao mŭt sang mnia, ksiêm dlăng hră dưi nao mŭt sang mnia mbĭt anăn đru kơ mnuih buôn sang hluê ngă kjăp 5 asăp mtă hlăm hdră gang mkhư̆ klei ruă tưp.