VOV4.Êđê- Tui si êpul gĭt gai bruă gang mkhư̆ klei ruă tưp Covid-19 čar Dak Lak, hruê mbruê 6/8, hlăm čar lŏ mâo 17 čô mâo klei ruă tưp Covid-19 hlăm 8 kdriêk, wăl krah. Mđĭ ênoh mnuih mâo klei ruă tưp Covid-19 hlăm čar truh kơ 347 čô. Hŏng 6 čô mâo klei ruă tưp mrâo hlăm hruê, truh kơ ară anei, kdriêk Krông Bông mâo leh 53 čô mnuih ruă lehanăn jing alŭ wăl mâo ênoh mnuih ruă lu tal 2 hlăm čar. Čư̆ Kuiñ ăt jing kdriêk mâo ênoh mnuih ruă lu hĭn hŏng 66 čô.

Hlăm 17 čô mâo klei ruă mrâo anăn, mâo 3 čô jing F1 mơ̆ng pô ruă êlâo anăn. 14 čô mkăn dưi hmao ƀuh hlăm yang ƀuôn, mrâo wĭt mơ̆ng ƀuôn prŏng Hồ Chí Minh lehanăn čar Bình Dương. Ăt hruê mbruê, knơ̆ng bruă mdrao mgŭn čar Dak Lak jao leh hră dưi kƀiă mơ̆ng sang êa drao kơ sa čô mniê mâo klei ruă tưp mâo mrô 51261 ti ƀuôn Ñač, să Ea Bông, kdriêk Krông Ana. Sơnăn, čar Dak Lak mâo leh 8 čô mâo klei ruă tưp Covid-19 dưi mdrao hlao.

Pô mblang: Y-Ƀel Êban