VOV4.Êđê - Tui si êpul gĭt gai bruă gang mkhư̆ klei ruă tưp Covid-19 čar Dak Lak, hruê mbruê 9/8, ti čar Dak Lak lŏ mâo 19 čô mâo kman Sars CoV 2. Hlăm 19 čô anăn, mâo 11 mâo klei ruă tưp hlăm yang ƀuôn lehanăn 8 čô dưi hmao ƀuh hlăm anôk bi ktlah, čuăl krĭng. Hlăm ênoh 11 čô mâo klei ruă tưp hlăm yang ƀuôn, mâo 6 čô jing F1 ti anôk mâo klei ruă tưp mrâo hmao ƀuh ti să Ea Riêng, kdriêk M’Drak hlăk hruê 8/8, 3 čô ka thâo bĭt anôk tưp ti alŭ 6, să Vụ Bổn Kdriêk Krông Pač.

Êngao kơ 3 čô anei, tui si bruă sang čư̆ êa să Vụ Bổn, lŏ mâo 17 čô mkăn hlăm klei ksiêm mkă hmar mâo kman Sars CoV 2 dôk guôn klei bi mklă mơ̆ng anôk bruă ksiêm dlăng klei ruă tưp čar Dak Lak. Sơnăn, yap truh kơ 5 mmông tlam hruê mbruê 9/8, čar Dak Lak mâo 410 čô mnuih ruă, hlăm anăn dôk mdrao kơ 393 čô, 16 čô leh mdrao hlao lehanăn sa čô djiê.

Y Ƀel pô mblang