VOV4.Êđê - Tui si êpul gĭt gai bruă gang mkhư̆ klei ruă tưp Covid-19 čar Dak Lak, hruê mbruê 8/8, hlăm čar lŏ mâo 20 čô mâo kman Sars CoV 2 hlăm 6 kdriêk lehanăn ƀuôn prŏng. Hlăm 20 čô anăn, mâo 14 čô mâo klei ruă tưp hlăm yang ƀuôn, mâo 3 čô ti kdriêk M’Drak ka thâo bĭt ti anôk tưp klei ruă, dưi hmao ƀuh hlăm klei ksiêm mkă hrŏng mơ̆ng anôk bruă mdrao mgŭn ti kdriêk.

Djŏ tuôm hŏng dŭm čô mmuih ruă mrâo hmao ƀuh anei, hlăm krah mlam hruê 7/8, anôk bruă mdrao mgŭn kdriêk M’Drak ngă leh bruă čuăl krĭng sang B3 (mâo anôk mdrao krŭ wĭt ai ktang - dŏng mdrao lehanăn anôk mdrao Nội-Nhi -Nhiễm). jih jang phung mă bruă mdrao mgŭn, mnuih ruă, pô kiă mnuih ruă dưi bi ktla sa anôk lehanăn ma mtă ksiêm mkă kman hmar. Yap truh kơ 5 mmông tlam mbruê, čar Dak Lak mâo 391 čô mnuih mâo kman Sars CoV 2, hlăm anăn dôk mdrao kơ 376 čô, 14 čô hlao lehanăn mâo leh sa čô djiê.

Y Ƀel pô mblang