VOV4.Êđê - Hluê si klei gĭt gai mơ̆ng Anôk bruă gang mkhư̆ klei ruă Covig 19 čar Dak Lak, hlăm hruê 4/8, kluôm čar lŏ mâo 24 čô đing djŏ kman Sar CoV2 ti 9 kdriêk, wăl krah. Êa Kar jing alŭ wăl mâo ênoh mnuih ruă lu hĭn hŏng 6 čô. Lehkơnăn truh kdriêk Čư̆ Mgar lehanăn Krông Pač, grăp alŭ wăl mâo 5 čô ruă, wăl krah Ƀuôn Hô lehanăn kdriêk Ƀuôn Đon grăp alŭ wăl mâo 2 čô ruă; dŭm kdriêk Êa Hleo, Êa Sup, Krông H’Nang lehanăn Čư̆ Kuiñ grăp kdriêk mâo 1 čô ruă.

Păt čiăng jih phung ruă anei dưi hmao ƀuh hlăm êpul êya yang ƀuôn lehanăn djŏ tuôm ti anôk dôk bluh mâo klei ruă msĕ si ƀuôn prŏng Hồ Chí Minh, čar Đồng Nai lehanăn čar Bình Dương. Anôk bruă mdrao mgŭn čar Dak Lak tui duah leh êbeh 100 čô F1 djŏ tuôm hŏng phung ruă anei čiăng mă mta ksiêm dlăng lehanăn ba bi ktlah mklin sa anôk. Tĭng truh 5h tlam hruê 4/8, čar Dak Lak mâo leh 307 čô djŏ kman Sar CoV2, hlăm anăn dôk dŏng mdrao 300 čô, 7 čô hlao dưi kbiă leh mơ̆ng sang êa drao lehanăn amâo mâo mnuih djiê ôh./.

H Nêc pô mblang