VOV4.ÊđêKlei hưn mthâo mơ̆ng êpul gĭt gai bruă gang mkhư̆ klei ruă tưp Covid-19 čar Dak Lak brei thâo, hruê mbruê 2/8, hlăm čar lŏ mâo 25 čô đĭng mâo klei ruă tưp Covid-19. 18 čô hlăm 25 čô anăn jing dŭm čô mâo klei bi knăl mâo klei ruă tưp mrâo wĭt mơ̆ng ƀuôn prŏng Hồ Chí Minh lehanăn čar Bình Dương. 6 čô dưi hmao ƀuh hlăm dŭm anôk leh bi ktlah. Anei jing phung F1 djŏ tuôm hŏng dŭm čô mâo klei ruă êlâo anăn ti kdriêk Ƀuôn Đon, wăl krah Ƀuôn Hồ lehanăn ƀuôn prŏng Ƀuôn Ama Thuôt.

Ăt hlăm hruê mbruê, čar Dak Lak čih yap mâo sa čô mnuih ruă ti alŭ 3, să Ea Kmŭt, kdriêk Êa Kar, jing sa čô mgăt êdeh mơ̆ng knơ̆ng bruă dăng kông Êlan mtah. Pô anei ka thâo bĭt ôh ti anôk tưp lehanăn mâo klei găn hiu lu anôk msĕ si Ninh Thuận, Bình Thuận, Phan Thiết, ƀuôn prŏng Hồ Chí Minh, Đà Nẵng, Gia Lai. Snăn, truh kơ ară anei, yap truh kơ 5 mmông tlam hruê mbruê, čar Dak Lak mâo 265 čô mnuih mâo klei ruă tưp Covid-19, hlăm anăn dôk mdrao kơ 258 čô, 7 čô dưi mdrao hlao lehanăn ka mâo ôh mnuih djiê.

Pô mblang: Y-Ƀel Êban