VOV4.Êđê- Klei hưn mơ̆ng Anôk bruă gĭt gai hdră gang mkhư̆ klei ruă Covid 19 čar Dak Lak, tlam hruê 19/7, alŭ wăl anei lŏ mâo 6 čô djŏ kman Sar Cov2 ti ƀuôn prŏng Ƀuôn Ama Thuôt lehanăn dŭm kdriêk Êa Hleo, Čư̆ Kuiñ, Krông Pač. Kdriêk Êa Hleo lŏ mâo 3 čô ruă mrâo, jing F1 ayŏng Q.C.T., lehanăn amai L.T.H., dôk ti alŭ 2B, să Êa Hleo, kdriêk Êa Hleo mâo leh anôk bruă djŏ tuôm čar Dak Lak bi mklă djŏ kman Sar CoV2 hlăm akŏ mmông tlam mbruê jing mnuih hlăm sa gŏ sang hŏng ung mô̆ T lehanăn H.

Anôk mrâo ƀuh klei ruă hlăm tlam hruê 19/7 djŏ tuôm hŏng mnuih mrâo wĭt mơ̆ng Bình Dương, jing amai H.K.A, kkiêng thŭn 1996 ti alŭ Thạch Lũ, să Ea Yông, kdriêk Krông Pač. Amai A dôk hlăm krĭng An Bình, ƀuôn hgŭm An Bình, ƀuôn prŏng Dĩ An, čar Bình Dương. Leh mâo mnuih ruă mrâo, anôk bruă mdrao mgŭn čar Dak Lak bi hgŭm leh hŏng alŭ wăl đru tui duah mnuih bi tuôm hŏng amai A êjai pô anei wĭt mơ̆ng Bình Dương truh ti Dak Lak; krih êa drao bi mdjiê kman ti Anôk bruă mdrao mgŭn să Êa Yông./.

Pô mblang: H’Nêč Êñuôl