VOV4.Êđê - Mmăt hruê 30-5, Nay Phi La, Khua Knơ̆ng bruă mdrao mgŭn čar Dak Lak bi mklă ti alŭ wăl lŏ mâo 1 čô mnuih djŏ kman Sars –Cov-2. Anăn jing mniê, ti alŭ 7, să Čư Môt, kdriêk Ea Hleo, čar Dak Lak. Pô anei dôk sa adŭ sang jưh hŏng mnuih ruă Covid-19 ti quận 12, ƀuôn prŏng Hồ Chí Minh. Ñu đĭ êdeh wĭt ti alŭ 7, să čư̆ Môt hlăk 6 mmông aguah 26/05/2021. Mơ̆ng hruê 26 truh hruê 29-5 bi tuôm leh hŏng lu mnuih ti alŭ wăl. Aguah 30-5 pô anei dưi ba bi ktla ti sang hră Cao đẳng Công nghệ Tây Nguyên leh anăn mă mta ksiêm mkă jing djŏ kman SARS CoV2.

Hlăm mlam hruê 30-5 mtam, čar Dak Lak bi kƀĭn mjêč čiăng pŏk ngă dŭm hdră kwang dar alŭ wăl pô anei hdĭp mda leh anăn bi ktlah phung bi tuôm giăm. Mbĭt anăn lŏ dơ̆ng duah phung F1, F2. Knơ̆ng bruă sang čư̆ êa čar Dak Lak ăt brei mjưh mdei bruă dŭ mdiăng tuê hŏng êdeh ô tô, êdeh taxi, êdeh hiu čhưn ênguê mơ̆ng Dak Lak truh dŭm alŭ wăl: ƀuôn prŏng Hồ Chí Minh, čar Bắc Ninh, čar Bắc Giang leh anăn mklăk wĭt yap mơ̆ng krah mlam hruê 31-5-2021.

H Zawut pô mblang