VOV4.Êđê - Hruê 11-8, čar Dak Lak lŏ mâo 18 čô ruă Covid-19 mđĭ ênoh mnuih ruă ti čar mâo 464 čô. Hlăm ênoh 18 čô mnuih ruă Covid-19 mrâo čih yap ti Dak Lak, kdriêk Krông Bông mâo lu hĭn hŏng 7 čô, leh anăn kdriêk Krông Pač hŏng 5 čô.

Lu phung ruă mrâo jing mtưp mơ̆ng phung ruă êlâo anăn. Klei ruă Covid-19 ti Dak Lak mâo klei bi knăl mđĭ kyar pral ti dŭm să krĭng taih kbưi, anôk ngă bruă mdrơ̆ng hŏng klei ruă tưp lŏ mâo klei bi knăl ngă ngơi mang, bi ktlah yang ƀuôn amâo sĭt êmĭt, phung wĭt mơ̆ng krĭng mâo klei ruă tưp bi ktlah hjăn amâo djŏ hdră kčah. Ăt hlăm hruê 11-8, mâo 24 čô mnuih ruă Covid-19 ti Dak Lak dưi kbiă mơ̆ng sang êa drao, mđĭ ênoh mnuih ruă hlao klei ruă leh anăn dưi kbiă mơ̆ng sang êa drao truh 54 čô mnuih. Snăn, truh ară anei čar Dak Lak adôk 409 čô dôk mdrao mgŭn.

H Zawut pô mblang