VOV4.Êđê - Hruê 6-6, Knơ̆ng bruă sang čư̆ êa să Čư̆ San, kdriêk M’Drak, čar Dak Lak mkŏ mjing leh klei ruah khua phung bi ala Êpul gơ̆ng bruă buôn sang să, wưng thŭn 2021-2026 ti 3 anôk bruă ruah khua jing alŭ 9,10,11. Mta phŭn lŏ ruah khua jing hruê 23/5/2021, ti 3 anôk bruă ruah khua mrô 9, 10,11 ti să Čư̆ San mâo ênoh mnuih nao ruah ka mâo 50% ênoh phung bi ala čih anăn.

Čih yap ti 3 anôk bruă ruah khua ai êwa mkŏ mjing jăk, djŏ hdră bhiăn. Ti dŭm anôk lŏ ruah khua, Knơ̆ng bruă sang čư̆ êa să Čư̆ San dăp phung mă bruă mdrao mgŭn, ktrâo lač kơ phung bi ala kơ mnuih ƀuôn sang dôk bi kbưi plah wah mnuih hŏng mnuih leh anăn mprăp êa rao kngan mdjiê kman, mkă hnơ̆ng hlơr asei nmlei, truă čhiăm guôm ƀô̆, čiăng rơ̆ng hdră kčah gang mkhư̆ klei ruă tưp. Klei tŭ, yap truh mmăt hruê 6/6, 3 anôk bruă ruah khua phung bi ala Êpul gơ̆ng bruă buôn sang să Čư̆ San mâo ênoh phung bi ala nao ruah msĕ si: Ti mrô 9 mâo 88%, ti mrô 10 mâo giăm 74%, ti mrô 11 mâo êbeh 22%.

H Zawut pô mblang