VOV4.Êđê- Hluê si Anôk gĭt gai hdră gang mkhư̆ klei ruă Covid 19 čar Dak Lak, hlăm hruê 12/8, kluôm čar lŏ mâo 12 čô djŏ klei ruă Covid 19. Mđĭ ênoh mnuih ruă ti čar truh 476 čô. Hlăm ênoh 12 čô mrâo ruă mâo 3 čô wĭt mơ̆ng ƀuôn prŏng Hồ Chí Minh lehanăn Đồng Nai. 9 čô adôk djŏ tuôm kơ mnuih ruă dưi hưn mthâo leh êlâo anăn. Klei năng mđing, mâo 3 čô djŏ tuôm ti anôk dôk mâo lu mnuih ruă ti să Vụ Bổn, kdriêk Krông Pač.

 Wăl Block C Hoàng Anh Gia Lai arăng kwang dar hlăm mlam

2 čô ruă mkăn ti krĭng sang dlông Hoàng Anh Gia Lai, ƀuôn hgŭm Tự An, ƀuôn prŏng Ƀuôn Ama Thuôt djŏ tuôm kơ mnuih ruă ti alŭ 20, să Čư̆ Bông, kdriêk Êa Kar. Djŏ tuôm kơ 2 čô ruă anei, anôk bruă mdrao mgŭn tui duah leh 15 čô jing F1, hlăm anăn 2 čô F1 mâo boh tŭ ksiêm dlăng pral djŏ kman SARS –CoV-2. Hlăm mlam hruê 11/8, dŭm êpul djŏ tuôm nao kwang dar leh krĭng anei lehanăn mă mta ksiêm dlăng hŏng jig jang mnuih dôk ti Block C krĭng sang dlông Hoàng Anh Gia Lai.

 Mnuih mă bruă mdrao mgŭn test pral kơ mnuih ƀuôn sang hlăm wăl Block C Hoàng Anh Gia Lai

Hlăm hruê 12/8, anôk bruă mdrao mgŭn Dak Lak ăt jao hră bi mklă dưi kbiă mơ̆ng sang êa drao kơ 20 čô hlao leh klei ruă Covid 19. Snăn, truh ară anei, Dak Lak mâo leh 74 čô mnuih hlao leh klei ruă Covid 19 lehanăn dưi kbiă mơ̆ng sang êa drao./.

Pô mblang: H’Nêč Êñuôl