VOV4.Êđê- Hruê mbruê (19/8), čar Dak Lak mâo ênoh mnuih mâo klei ruă tưp Covid-19 kdưn hĭn mơ̆ng hruê klei ruă tưp bluh đĭ hlăm čar. Hlăm 56 čô anăn, mâo 47 hlăm sa êpul mnuih ruă hlăm yang ƀuôn. Tui si knơ̆ng bruă mdrao mgŭn čar Dak Lak, êpul mnuih ruă mrâo hĭn hlăm čar dưi hmao ƀuh ti Ƀuôn Kwăng A, să Čư̆ Bao, wăl krah Ƀuôn Hồ. Yap truh kơ tlam mmăt mbruê, ênoh mnuih mâo klei ruă tưp Covid-19 hlăm êpul mnuih ruă anei jing 46 F0.

Nay Phi La, khua kiă kriê knơ̆ng bruă mdrao mgŭn čar Dak Lak lač, anôk tưp lar hlăm êpul mnuih ruă anei ka thâo klă ôh, čiăng dưi bi klă klei anei srăng lŏ mâo klei čih hưn kơ dŭm čô mgăt êdeh nao truh leh ti đang lŏ hma Čư̆ Bao. Yap mơ̆ng akŏ mlan 7 truh kơ ară anei, mâo leh 6 kdriêk, wăl krah, ƀuôn prŏng mâo dŭm êpul mnuih ruă mơ̆ng 10 kơ dlông. Hlăm anăn ƀuôn prŏng Ƀuôn Ama Thuôt mâo 2 êpul mnuih ruă, kluôm ênŭm mâo 30 čô, wăl krah Ƀuôn Hồ lehanăn dŭm kdriêk: Čư̆ Kuiñ, Krông Bông, Krông Pač, M’Drak, grăp alŭ wăl mâo sa êpul mnuih ruă hŏng jih jang 155 čô mnuih ruă. Kyua ngă hmar klei čuăl krĭng, tui duah, ksiêm mkă kman, păt čiăng jih dŭm anôk mâo klei ruă dưi bi jih leh 14 hruê čuăl krĭng.

Pô mblang: Y-Ƀel Êban