VOV4.Êđê - Mrâo kčưm hruê tal 3 mdei ngă klei bi kbưi yang buôn hŏng hdră mtrŭn mrô 16, ngă klei bi kbưi yang ƀuôn hŏng hdră mtrŭn mrô 15, hruê mbruê 17/8, ƀuôn prŏng Ƀuôn Ama Thuôt lŏ mâo sa êpul phung mâo klei ruă tưp Covid-19 hlăm yang ƀuôn hŏng 7 čô mnuih ruă ka thâo bĭt anôk tưp. Pô dưi hmao ƀuh mâo klei ruă tưp ta êlâo jing T.Q.S k’kiêng thŭn 1968, dôk ti mrô sang 174 êlan Thủ Khoa Huân, ƀuôn hgŭm Thành Nhất, ƀuôn prŏng Ƀuôn Ama Thuôt.

Hlăm bruă tui duah lehanăn ksiêm mkă kman: mơ̆ng hruê 01/08 truh kơ hruê 15/8, pô anei tuôm găn nao lu anôk msĕ si: sang găp djuê ti ƀuôn Kŏ Đŭng, să Ea Ñuôl, kdriêk Ƀuôn Đon, anôk mkăp čhĭ êa pui ti êlan Nguyễn Thị Định, ƀuôn hgŭm Thành Nhất, kjhiêk êlan mrô 139 Thủ Khoa Huân. Ară anei, bruă sang čư̆ êa alŭ wăl lehanăn knơ̆ng bruă mdrao mgŭn dôk ngă klei čuăl krĭng, tui duah dŭm čô djŏ tuôm hŏng 7 čô mâo klei ruă tưp hlăm yang ƀuôn anei. Klei êrô hiu, bi tuôm hŏng F0 dưi hmao ƀuh hlăm hruê mmông ƀuôn prŏng dôk ngă klei bi kbưi yang ƀuôn, jih jang mnuih ƀuôn sang dôk hlăm sang amâo dưi kbiă mơ̆ng sang tơdah amâo mâo bruă mjêč.

Y Bel pô mblang