VOV4.Êđê – Yap truh 4 mmông tlam mbruê 30-7, čar Dak Lak mâo jih jang 204 čô mnuih djŏ klei ruă Covid-19, đĭ 19 čô mkă hŏng hruê êlâo anăn. Hluê si klei hâo hưn mơ̆ng Anôk bruă gĭt gai gang mkhư̆ klei ruă Covid-19 čar Dak Lak, 19 čô mnuih ruă mrâo ƀuh ti 7 kdriêk, ƀuôn prŏng.

Hlăm anăn, ƀuôn prŏng Ƀuôn Ama Thuôt lu hĭn mâo 5 čô leh anăn mđĭ ênoh mnuih ruă ti ƀuôn prŏng đĭ 40 čô, dôk tal 2 kluôm čar, leh anăn kdriêk Čư̆ Kuiñ hŏng 55 čô. Phung ruă mrâo dưi ƀuh kyua tuôm wĭt mơ̆ng ƀuôn prŏng Hồ Chí Minh leh anăn čar Bình Dương amâodah bi mtưp mơ̆ng dŭm anôk mâo klei ruă ƀuh leh êlâo anăn. Snăn, ênoh mnuih ruă Covid-19 čih yap ti Dak Lak truh mmông anei jing 204 čô mnuih, ti jih jang 15 kdriêk, wal krah, ƀuôn prŏng ti čar. Hlăm anăn, dôk mdrao mgŭn 197 čô, 7 čô hlao leh, leh anăn ka mâo ôh mnuih ruă djiê.

H Zawut pô mblang