VOV4.Êđê - Hŏng dŭm bruă đru duh ƀơ̆ng čiăng kơ amai adei mniê mđĭ kyar bruă duh mkra, dŭm gưl phung mniê ti Dak Lak lŏ dơ̆ng gĭr ktưn čiăng pŏk ngă dŭm bruă mjing keh čiăng blei hră ênua mdrao mgŭn mđup brei kơ phung dleh dlan. Bruă ngă anei đru kơ lu amai adei mniê mâo klei găl dưi dưn hdră mdrao mgŭn, kriê dlăng klei suaih pral, bi hrŏ klei ktrŏ bruă duh mkra tơdah amâo myun ruă duam, hơĭt kjăp klei hdĭp mnuih ƀuôn sang hlăm dŭm krĭng ƀuôn sang mrâo ti čar Dak Lak.

Mâo hră ênua bruă mdrao mgŭn mơ̆ng êpul bruă phung mniê hlăm să mkăp brei, amai Đặng Thị Bình, ti alŭ 1, să Ea Kpam, kdriêk Cư̆ Mgar čar Dak Lak mâo klei mơak sơnăk. Amai Bình brei thâo, gŏ sang amâo mâo lăn ala, ung mô̆ knŏng nao mă bruă mưn čiăng mâo prăk rông 2 čô anak hlăk nao sang hdră mơar, hlăm 2 čô anăn mâo sa čô êwiên. Sui leh amâo tuôm mâo hră ênua bruă mdrao mgŭn, amai amâo jhŏng nao ksiêm mkă klei ruă asei mlei huĭ dah liê lu prăk kăk. Mơ̆ng mlan 9 thŭn anei, mâo êpul phung mniê mkăp brei hră ênua bruă mdrao mgŭn dưi yua hlăm sa thŭn, amai mâo yơh klei hơĭt hlăm ai tiê. “Gŏ sang kâo knap mñai êdi, mâo êpul bruă phung mniê hlăm să mkăp brei sa pŏk hră ênua bruă mdrao mgŭn, kâo mâo klei lač êdi kơ diñu. Mâo hră anei tơdah nao ksiêm dlăng klei ruă ăt mdul ƀiă mơh, mâo klei hơĭt hlăm ai tiê, bi hrŏ ƀiă ênoh prăk êjai nao ksiêm mkă klei ruă”.

Mbĭt hŏng amai Bình thŭn anei mâo 55 čô mniê mkăn ti kdriêk Čư̆ Mgar dưi mkăp brei hră ênua bruă mdrao mgŭn. Aduôn Lê Thị Thu Hiền, khua kiă kriê êpul hgŭm bruă phung mniê kdriêk Čư̆ Mgar brei thâo, bruă mkăp brei hră ênua bruă mdrao mgŭn kơ phung mniê leh anăn hđeh mâo klei hdĭp dleh dlan dưi mkŏ mjing leh lu thŭn hŏng anei. Mâo bruă anăn yơh dưi đru kơ phung Amai adei leh anăn phung hđeh sang hră mâo klei găl răng mgang klei suaih pral pô, bi hrŏ klei rŭng lăn leh anăn mdul hĭn klei liê prăk kăk tơdah tuôm hŏng klei êngoh duăm. Čiăng rơ̆ng nanao kơ bruă anei dŭm êpul bruă phung mniê mâo lu hdră bi mguôp mdê mdê, mâo klei sa ai mơ̆ng phung amai adei hlăm êpul. “Bruă iêo mthưr klei bi mguôp dưi mkŏ mjing tui si klei bi hmô mơ̆ng phung mniê msĕ si: hrui mă djah djâo ba čhĭ, dŭm êpul mkiêt mkuôm amâodah iêo mthưr klei bi mguôp mơ̆ng phung amai adei, hlăm bruă anei diñu mâo klei sa ai leh anăn hur har nao hgŭm.”

Amâo djŏ knŏng hjăn kdriêk Čư̆ Mgar, bruă mkăp brei hră ênua bruă mdrao mgŭn mâo lu gưl bruă ti čar Dak Lak mkŏ mjing leh anăn pŏk phai. Msĕ ti să Ea Kao, ƀuôn prŏng Ƀuôn Ama Thuôt, êpul phung mniê bi mguôp leh ngăn prăk hŏng bruă hrui mă djah djâo leh anăn ba chĭ. Hluê si aduôn Nguyễn Thị Tuyết, khua êpul phung mniê să Ea Kao, mơ̆ng thŭn dih truh kơ thŭn anei, hlăm bruă phung amai adei hrui mă djah djâo leh anăn lŏ ba čhi, êpul mâo leh 6 êklăk prăk leh anăn blei 9 hră ênua bruă mdrao mgŭn kơ phung amai adei hlăm êpul mâo klei hdĭp dleh dlan.Anei jing sa hlăm dŭm hră mơ̆ng êpul phung mniê mtrŭt mjhar, bruă anei čiăng hrui mă jih djah djâo thâo yua, djah ksu čiăng bi doh wăl hdĭp mda leh anăn hmei mâo klei mĭn anei jing bruă klam yuôm bhăn čiăng đru kơ phung amai adei mâo klei hdĭp dleh dlan.

Aduôn Trần Thị Phong, k’iăng khua kiă kriê êpul bruă phung mniê čar Dak Lak brei thâo, bruă mkăp brei hră ênua bruă mdrao mgŭn kơ phung amai adei mniê mâo klei hdĭp dleh dlan mơ̆ng êpul hlăm kdriêk leh anăn dŭm anôk bruă nah gŭ mkŏ mjing mơ̆ng thŭn 2018. Dŭm bruă anăn dưi đru kơ phung amai adei kriê dlăng klei suaih pral pô grăp thŭn. Dưi ƀuh klă boh tŭ dưn mơ̆ng klei bi hmô anei, kyuanăn lu êpul anôk mkăn ăt hriăm leh anăn wĭt ngă hlăm alŭ wăl pô. Mâo dŭm anôk bruă ngă jăk msĕ si kdriêk Čư̆ Mgar, wăl krah ƀuôn Hồ leh anăn ƀuôn prŏng Ƀuôn Ama Thuôt. Čiăng ngă bruă anei mâo boh tŭ dưn leh anăn kjăp, dŭm êpul êya mdưm leh mta phŭn mkăp brei hră ênua bruă mdrao mgŭn kơ phung amai adei hlăm êpul mâo klei dleh dlan jing mta phŭn hlăm hdră ngă bruă grăp thŭn čiăng mđĭ ai phung amai adei nao hgŭm, mbĭt anăn mâo hdră bi mguôp ngăn prăk đru kơ lu phung amai adei mkăn. Hdră ngă bruă mơ̆ng anôk bruă dưi ƀuh diñu mâo klei bi hmô ngă bruă jăk, sitôhmô, duiñ djah djâo ba čhĭ, mă bruă mưn hŏng êpul leh anăn pĕ sa kdrêč čiăng blei hră ênua bruă mdrao mgŭn. Hdră ngă bruă mâo lu mta mdê mdê, ƀiădah dưi bi êdah klei thâo ngă bruă mơ̆ng dŭm êpul, hmei ƀuh bruă anăn năng mtrŭt mđĭ êdi.

Bruă mkăp brei hră ênua bruă mdrao mgŭn kơ phung amai adei hlăm êpul mâo klei hdĭp dleh dlan ti čar Dak Lak jing bruă mâo boh tŭ dưn yuôm bhăn. Đru kơ phung amai adei mâo klei thâo srăng hĭn kơ klei jăk êjai bruă hră ênua bruă mdrao mgŭn, dưi mdul hĭn prăk kăk tơdah êngoh duăm, đru kơ phung amai adei dưi nao ksiêm dlăng klei suaih pral pô, mđĭ hnơ̆ng mâo ênŭm hră ênua bruă mdrao mgŭn hlăm mnuih ƀuôn sang ti alŭ wăl.