VOV4.Êđê -  Ti anăp klei dleh dưi ksiêm dlăng klei ruă tưp, tlam mbruê (31/5), bruă sang čư̆ êa ƀuôn prŏng Ƀuôn Ama Thuôt, čar Dak Lak hdơ̆ng lŏ ngă bruă hlăm dŭm anôk ksiêm dlăng ti êlan dơ̆ng Hồ Chí Minh găn nao kban 14 ti să Hoà Phú čiăng gang mkhư̆ klei ruă tưp Covid-19. Tui hluê anăn, mơ̆ng 5 mmông tlam hruê mbruê, dŭm êpul êya msĕ si kahan ksiêm hlăm êlan klông, êpul răng mgang klei êđăp ênang, bruă mdrao mgŭn… lŏ wĭt ngă bruă ksiêm dlăng, ksiêm dlăng mnuih lehanăn êdeh êdâo mŭt kƀiă hlăm alŭ wăl čar Dak Lak čiăng gang mkhư̆ klei bluh đĭ klei ruă tưp.

Ksiêm dlăng kơ bruă ngă jăk dŭm hdră êlan gang mkhư̆ klei ruă tưp lehanăn bruă mdrao mgŭn (Ksiêm dlăng klei hlơr, guôm ƀô̆ mta, hưn mdah bruă mdrao mgŭn, mdjiê kman dŭm čô mnuih lehanăn êdeh êdâo găn hlăm anôk ksiêm dlăng. Mbĭt hŏng anăn. Srăng ksiêm dlăng čiăng hmao ƀuh dŭm čô mnuih mâo klei ruă tưp Covid-19 mâodah đing mâo klei ruă tưp Covid-19, dŭm čô mnuih mâo klei bi knăl msĕ mâo klei ruă tưp Covid-19 čiăng ngă klei bi ktlah lehanăn mdrao mgŭn.

Mmăt hruê 31/5, aduôn H’Yim Kđoh - K’iăng khua anôk bruă sang čư̆ êa čar Dak Lak klam ngă K’iăng khua Anôk bruă gĭt gai hdră gang mkhư̆ klei ruă Covid 19 mơ̆ng čar bi mklă leh hdră mtrŭn pŏk hluê ngă mjêč hdră msir gang mkhư̆ klei ruă Covid 19 hlăk alŭ wăl lŏ mâo mnuih ruă Covid 19 tal 4 ti kdriêk Êa Hleo, jing pô ruă mrô 7186. Hluê si hră mtrŭn, kluôm alŭ wăl ti ƀuôn prŏng Ƀuôn Ama Thuôt amâo dưi bi kƀĭn êgao kơ lu mnuih ti dŭm anôk čhĭ mnơ̆ng ƀơ̆ng, êa mnăm, anôk čhĭ kphê, anôk hlăp lêñ, anôk hlăp mbul lu mnuih. Mdei êjai anôk čhĭ mnơ̆ng ƀơ̆ng, êa mnăm djiêu êlan. Ăt hluê si hră mtrŭn anei, mnuih ƀuôn sang wĭt amâo dah nao ti krĭng mâo klei ruă Covid 19 dleh dưi ksiêm dlăng brei nao mtam kơ anôk bruă mdrao mgŭn hưn mthâo klei suaih pral amâo dah dưi ktrâo lač brei hluê ngă hdră bi ktlah ti sang hlăm wang 21 hruê. Ti alŭ wăl kdriêk Êa Hleo hluê ngă kjăp asăp kwang dar, bi ktlah yang ƀuôn, gang mkhư̆ klei ruă mơ̆ng 9h mmăt hruê 31/5/2021 truh kơ hbĭl mâo klei hưn mthâo mrâo./.