VOV4.Êđê - Ti anăp klei dleh ksiêm dlăng mơ̆ng klei ruă hlăm êmô kbao, ŭn mnŭ. Knơ̆ng bruă lŏ hma lehanăn mđĭ kyar krĭng ƀuôn sang čar Dak Lak mrâo mâo leh hdră êlan mkŏ mjing mlan bi doh, mdjiê kman, bi mdoh wăl hdĭp mda gưi tal 1 thŭn 2021 lehanăn gang mkhư̆ klei ruă tưp hlăm alŭ wăl čar. Tui hluê anăn, mơ̆ng hruê 20/06/2021 truh kơ hruê 20/07/2021, dŭm anôk bruă, gŏ sang rông êmô kbao, ŭn mnŭ hlăm alŭ wăl čar srăng krih êa drao mdjiê kman hlăm war rông, anôk rông mnơ̆ng lehanăn anôk riêng gah sa blư̆ hlăm sa hruê kăm. Bi doh êdeh êdâo dŭ mdiăng, mnơ̆ng dhơ̆ng yua leh grăp blư̆ dŭ mdiăng. Kih waih doh anôk rông êmô kbâo, ŭn mnŭ. Hrui êmiêt jih djah djâo čiăng čuh mâo dah dơr hĕ. Tĭng truh hruê 17/6, Dak Lak mâo 8/15 kdriêk, wăl krah, ƀuôn prŏng mâo klei ruă tian ô̆ eh hlăm ŭn mơ̆ng afarik, ênoh ŭn mâo klei ruă lehanăn ngă klei čuh bi rai truh kơ 350 drei.

Y Khem pô mblang