VOV4.Êđê- Ti anăp klei mâo dleh dưi ksiêm dlăng mơ̆ng klei ruă Covid 19 hlăk ênoh mnuih ruă đĭ nanao hlăm dŭm hruê êgao, Anôk bruă sang čư̆ êa čar Dak Lak bi mklă mkŏ mjing Sang êa drao jing jai mrô 2 čiăng dŏng mdrao mnuih ruă Covid 19. Sang êa drao jing jai mrô 2 dôk hlăm Anôk bruă mdrao mgŭn kdriêk Čư̆ Kuiñ kiă kriê, mâo 1.500 boh jhưng đih, mdơ̆ng ti wăl Sang hră ksiêm hriăm bruă kđi čar Dak Lak mrô 1 êlan Nguyễn Lương Bằng, ƀuôn prŏng Ƀuôn Ama Thuôt.

Tinei srăng dŏng mdrao, kriê dlăng, bi ktlah mnuih ruă mâo boh tŭ ksiêm dlăng djŏ kman klei ruă Covid 19 mâo klei bi êdah hdjul; Mă mta ksiêm dlăng kơ mnuih ruă hdjul lehanăn phung mâo leh klei ruă mơ̆ng êlâo; Dŏng mdrao mjêč mnuih ruă lehanăn ba dŏng mdrao mnuih ruă kơ gưl dlông djŏ si klei kčah mtrŭn. Sang êa drao jing jai mrô 2 srăng mphŭn ngă bruă mơ̆ng akŏ mlan 11/2021./.

Pô mblang: H’Nêč Êñuôl