VOV4.Êđê - Truh kơ ară anei, 4/5 čô ruă Covid 19 ti gưl bluh mâo klei ruă tal 4 hlăm čar Dak Lak dưi kbiă leh mơ̆ng sang êa drao. Klei năng mđing, hlăm ênoh 4 čô ruă anei, mâo pô ruă Covid 19 mrô 3836 dưi đĭ nao kơ kjham, yua kdrăp masin đru bi êwa. Hdră lŏ krŭ wĭt klei suaih pral mơ̆ng pô ruă anei ba wĭt leh boh kdrŭt yuôm bhăn kơ phung nai aê mdrao hlăm hdră gang mkhư̆ klei ruă Covid 19.

Djă hră mơar kbiă mơ̆ng Sang êa drao leh 41 hruê mdrao klei ruă Covid-19, ayŏng V.Đ.D, kkiêng thŭn 1971, ti ƀuôn hgŭm Đạt Hiếu, wăl krah Ƀuôn Hô, čar Dak lak bŏ hŏng hơ̆k mơak leh anăn amâo mdei mni lač jăk kơ phung aê mdrao mdrao leh ñu hlăm wưng êgao. Ayŏng D brei thâo: Leh thâo pô djŏ klei ruă Covid-19 ñu huĭ snăk, rŭng răng hĭn anăn klei ruă truh kjham. 1 hruê kăm dưi kriê dlăng hŏng lu kdrăp mnơ̆ng mdrao mgŭn hlăm asei mlei, mâo mmông ruă jih hlăm asei mlei. Bi êwa dleh dlan ngă kơ ñu rŭng răng. Khă snăn, mâo klei mđĭ ai hmao kriê dlăng mơ̆ng phung aê mdrao, ñu hgao leh klei djiê čiăng lŏ wĭt hŏng gŏ sang leh anăn êpul êya. “Hlăk bi êwa hŏng masin kjham jing ai tiê rŭng răng, ăt ƀuh klei rŭng răng. Leh bi êwa dleh dlan, ƀiădah phung aê mdrao mđĭ ai nanao gĭr hgao klei dleh dlan anăn. Êngao thơ̆ng kơ bruă mdrao mgŭn snăn grăp hruê lŏ mđing kơ êsei huă, êa ksâo jăk snăk. Bi mni lač jăk kơ phung aê mdrao mdrao leh kâo hlăm wưng êgao.

Ayŏng D jing mnuih ruă Covid-19 tal 3836 hlăm hruê 15-5-2021. Ñu jing F1 mơ̆ng mnuih ruă 3052 ti Thuận Thành, Bắc Ninh.  Kyua djŏ mta covid-19 mrâo mơ̆ng Ấn Độ anăn klei suaih pral ñu mâo klei ruă kjham. Aê mdrao Châu Đương - Khua Sang êa drao hnak leh anăn ksŏ čar Dak Lak brei thâo: čiăng mdrao kơ mnuih ruă 3836 sang êa drao akâo klei đru mơ̆ng phung aê mdrao mơ̆ng Sang êa drao krĭng Lăn Dap Kngư leh anăn Sang êa drao Chợ Rẫy, ƀuôn prŏng Hồ Chí Minh hŏng lu kdrăp mnơ̆ng mdrao mgŭn. Mbĭt hŏng anăn, sang êa drao ăt hưn jih jang ênoh mrô mơ̆ng mnuih ruă kơ Anôk bruă mdrao mgŭn covid-19 ala čar ksiêm dlăng.

Klei gĭr ktưn mơ̆ng êpul aê mdrao ba leh klei tŭ dưn jăk, truh hruê 17-6 mnuih ruă 3836 mâo klei ksiêm mkă amâo lŏ ƀuh ôh kman SARS –CoV-2 gưl tal êlâo. Truh hruê 25-6 leh 3 blư̆ mkă amâo lŏ ƀuh kman, mnuih ruă dưi kbiă mơ̆ng sang êa drao. Lač kơ hdră mdrao kơ mnuih ruă 3836 aê mdrao Châu Đương brei thâo: “Mnuih ruă anei jing sa hlăm phung ruă mdê hjăn, mnuih ruă đih sang êa drao 14/5, 3 hrue êdei klei ruă truh kjham pral, snăn Sang êa drao mâo êpul mdrao mgŭn mơ̆ng Sang êa drao krĭng brei bi êwa hŏng ma sin leh anăn kar êrah nanao. Truh hruê 24 êpul mdrao mgŭn mơ̆ng sang êa drao Chợ Rẫy lŏ dơ̆ng hriê đru. Leh 7 hruê mdrao snăn pô ruă mâo klei bi mlih, mnuih ruă dưi mdei kar êrah, mdei bi êwa hŏng masin leh anăn dưi ksuê̆ masin bi êwa. Pô ruă anei truh kjham pral ƀiădah lŏ hlao pral snăk.”

Nguyễn Văn Hùng,  K’iăng Khua Knơ̆ng bruă mdrao mgŭn čar Dak Lak brei thâo, leh klei ruă Covid-19 bluh mâo truh ară anei, Dak Lak găn leh 2 gưl mdrao kơ mnuih ruă Covid-19 hŏng 8 čô mnuih ruă. Ƀiădah klei truh kơ kjham msĕ si mnuih ruă 3836 jing tal êlâo bruă mdrao mgŭn tuôm găn. Hlăm klei boh kdrăp mnơ̆ng, masin dôk kƀah, êpul aê mdrao ka mâo klei thâo, bruă mdrao hlao kơ mnuih 3836 jing klei mơak kơ phung aê mdrao mdrao mgŭn ti Sang êa drao hnak leh anăn ksŏ leh anăn ăt jing klei găl čiăng kơ phung aê mdrao ti čar dưi hriăm, mbŏ klei thâo: “Hŏng klei mdrao hlao kơ pô ruă anei snăn ñu ba kơ ayŏng adei mâo lu klei thâo. Lač sĭt jing kơ bruă krŭ wĭt klei suaih pral snăn hriăm 3 thŭn, ƀiădah amâo tuôm hŏng pô ruă anei, amâo ngă snăn amâo dưi thâo ôh. Kyua anăn phung ayŏng adei mă bruă sui leh hlăm anôk mdrao anei mâo klei hriăm. Si tô hmô tơdah sa mta mrô hlăm masin ktuê dlăng snăn diñu thâo brei mđĭ hnơ̆ng, bi hrŏ hnơ̆ng bi djŏ guôp. Anei jing klei thâo yuôm bhăn snăk.”

Yap truh ară anei, Dak Lak mdrao hlao leh kơ 7/8 čô mnuih ruă Covid-19 hlăm 2 gưl bluh mâo klei ruă tưp. Dŭm ruăt êa kơhŏ phung mdrao mgŭn truh kơ ară anei dưi mâo klei tŭ năng djŏ hŏng klei tŭ lŏ ba klei hdĭp kơ mnuih ruă.