VOV4.Êđê - Čar Dak Lak bi mklă leh hdră srăng tlŏ êbeh 17 êbâo hnơ̆ng vaccine Covid 19 dơ̆ng mơ̆ng hruê anei, hruê 24/4, hnưm hĭn sa hruê mkă hŏng hdră kčah. Kluôm čar Dak Lak, Knơ̆ng bruă mdrao mgŭn mkŏ mjing leh hdră mjuăt bi hriăm klă klơ̆ng kơ phung khua kiă kriê, phung knuă druh, mnuih mă bruă tlŏ mgang, hưn mthâo kơ vaccine Covid 19, ktrâo lač hdră ba yua, bi mklă, ksiêm dlăng êlâo kơ tlŏ, ktrâo lač kơ msir mgaih tơdah tăm mâo klei bi kdơ̆ng amâo jăk lehanăn hdră rơ̆ng klei êđăp ênang êjai tlŏ mgang.

Hdră tlŏ vaccine gang mkhư̆ Covid 19 gưl anei, čar Dak Lak mâo mkăp 17.050 hnơ̆ng čiăng tlŏ kơ 3 êpul mnuih tal êlâo mâo mnuih mă bruă hlăm anôk bruă mdrao mgŭn, mnuih nao hlăm hdră gang mkhư̆ klei ruă lehanăn êpul djă phao ktuang. Wưng tlŏ mơ̆ng hruê 24/4 truh kơ hruê 5/5/2021. Čiăng dưi mâo mta kñăm êbeh 95% ênoh mnuih mâo klei mđing tal êlâo dưi tlŏ mgang, Dak Lak pŏk leh hdră tlŏ mgang pŏk mlar mâo leh ti dŭm čar lehanăn thiăm dua gru hmô tlŏ mgang êđăp ênang ti Sang êa drao prŏng krĭng Lăn dap kngư lehanăn Sang êa drao ƀuôn prŏng Ƀuôn Ama Thuôt./.

H Nêč pô mblang