VOV4.Êđê- Tĭng truh yang hrue dơ̆ng hruê 25/7, hdră bi mdoh, rơ̆ng mâo djăp anôk bruă nah gŭ kơ mnuih ƀuôn sang lehanăn mnuih ruă ti Sang êa drao jing jai mrô 1 lehanăn krĭng bi ktlah mklin sa anôk ti Anôk dôk kơ phung hđeh hriăm hră ti Sang hră gưl prŏng Tây Nguyên mâo mprăp djăp ênŭm leh. Knŏng ti Sang êa drao jing jai mrô 1 dôk lŏ mkra êlan klei pui, êlan êa ti dŭm anôk jhat rai. Kơ kdrăp mnơ̆ng, masin, Sang êa drao mâo mkăp leh 1 boh masin ksiêm dlăng kman, sa kdrăp masin sinh hóa, 1 masin X-quang mbĕ hiu lehanăn dŭm kdrăp mnơ̆ng yua mkăn mơ̆ng Sang êa drao ƀuôn prŏng Ƀuôn Ama Thuôt lehanăn Sang êa drao prŏng krĭng lăn dap kngư.

Hlăm tlam hruê 25 – 26/7, Sang êa drao lŏ dơ̆ng mkra mđĭ, bi mdoh anôk kơ phung knuă druh mă bruă mdrao mgŭn; lŏ akâo hŏng Knơ̆ng bruă mdrao mgŭn mkăp brei êdeh dŏng mdrao mnuih ruă mjêč, kdrăp masin siêu âm, 3 kdrăp masin ksiêm dlăng kboh, êa drao gŭn..., mđing kơ knuă druh mă bruă, ktrâo lač kơ klei bhiăn ngă bruă, mjuăt bi hriăm kơ hdră kriê dlăng, dŏng mdrao mnuih ruă Covid 19. Tĭng truh kơ jih hruê 26/7, djăp hdră mprăp dưi ngă ênŭm lehanăn tŭ drông mnuih ruă mŭt dŏng mdrao hlăm aguah hruê 27/7./.

Pô mblang: H’Nêč Êñuôl