VOV4.Êđê-  Dŭm knơ̆ng, dhar bruă, bruă sang čư̆ êa dŭm alŭ wăl rơ̆ng dŭm klei jăk găl čiăng mkŏ mjing klei bi lông gưl 3 ti Dak Lak dưi mkŏ mjing hŏng klei êđăp ênang, djŏ klei bhiăn lehanăn mjing djăp klei găl kơ phung hđeh nao bi lông, boh nik hlăm wưng dôk bluh mâo klei ruă Covid 19 dleh dưi ksiêm dlăng ară anei, anei jing bruă dưi hưn mdah ti Klei bi kƀĭn anôk gĭt gai hdră bi lông gưl 3 thŭn 2021 čar Dak Lak mkŏ mjing tlam hruê 2/6. Klei bi lông gưl 3 thŭn 2021 ti Dak Lak mâo êbeh 19.800 čô hđeh nao bi lông ti 32 anôk bi lông, êbeh 830 adŭ bi lông.

Truh ară anei, kluôm čar bi mklă mâo 2 čô hđeh jing F1 lehanăn 39 čô hđeh jing F2, jing jang dôk ti kdriêk Êa Hleo s’aĭ. Ti anăp ênoh phung hđeh bi lông lu mbĭt hŏng klei ruă Covid 19 dleh dưi ksiêm dlăng, anôk gĭt gai mtă leh kơ Knơ̆ng bruă Sang hră m’ar mtô bi hriăm bi hgŭm hŏng êpul êya djŏ tuôm, bruă sang čư̆ êa alŭ wăl mkŏ mjing Klei bi lông êđăp ênang, kpă mngač, tŭ jăk mơ̆ng hdră mkŏ mjing klei bi lông truh kơ bruă bi mklă tŭ yap hriăm jih gưl 3./.

                                                    Pô mblang: H’Nêč Êñuôl