VOV4.Êđê - Klei bi lông gưl 3 thŭn 2021, kluôm čar Dak Lak mâo 19.800 čô hđeh bi mklă nao bi lông ti 32 anôk bi lông ti jih jang kdriêk, wăl krah lehanăn ƀuôn prŏng Ƀuôn Ama Thuôt. Čiăng kơ bruă mkăp pui kmlă dưi hluê ngă hŏng klei êđăp ênang, mkăp djăp ênŭm hlăm wưng mkŏ mjing klei bi lông, Anôk bruă Pui kmlă Dak Lak bi hgŭm leh hŏng Knơ̆ng bruă Sang hră m’ar mtô bi hriăm čar mkŏ mjing hdră ksiêm dlăng ti jih jang anôk bi lông, Êpul hgŭm mkŏ mjing klei bi lông, anôk bruă mkra mkra akŏ klei bi lông lehanăn brei puăng klei bi lông. Mơ̆ng anăn, anôk bruă mkŏ mjing leh hdră ngă bruă lehanăn pŏk hluê ngă bruă ba yua pui kmlă hŏng klei djŏ guôp, ba wĭt klei tŭ.

 Nguyễn Văn Hảo – Khua kriê dlăng hdră ngă bruă mơ̆ng Anôk bruă pui kmlă čar Dak Lak lač, khădah klei ruă Covid 19 dôk mâo dleh dưi ksiêm dlăng, ƀiădah anôk bruă pui kmlă pŏk ngă leh bruă ksiêm dlăng kdrăp mkăp pui, msir mghaih klei amâo jăk hlăm êlan pui kmlă kñăm gang mkhư̆ klei truh tăm mâo, mprăp djăp ênŭm kdrăp mnơ̆ng ăt msĕ mơh mđĭ hdră dôk gak răng, ksiêm dlăng, rơ̆ng klei bi hâo hưn 24/24 (hruê mlam) hlăm anôk bruă êjai wưng mkŏ mjing klei bi lông. “Klei bi lông gưl 3 thŭn 2021 ti Dak Lak mâo 2 anôk bruă yuôm bhăn jing Anôk đih đăm mdei săn prŏng Dakruko (anôk kđăm mkra akŏ klei bi lông) lehanăn Sang hră CĐ Sư phạm Đắk Lắk (anôk brei puăng klei bi lông), snăn dua alŭ wăl anei hmei jao kơ dua Anôk bruă pui kmlă Dưr lehanăn Dhŭng Ƀuôn Ama Thuôt mkŏ mjing hdră ksiêm dlăng, čih mkra hdră mkăp pui kmlă kơ 2 anôk anei. Dua anôk bruă mkăp pui kmlă anei mâo s’aĭ kdrăp ngă bruă mkăp lehanăn anôk bruă ăt mâo sa kdrăp masin hŏng hnơ̆ng 250 kWA čiăng ba yua tơdah tăm mâo klei truh amâo jăk, srăng brei êpul ngă bruă ba kdrăp anei, amâo lui hmăi truh kơ bruă kđăm mkra akŏ klei bi lông lehanăn brei puăng klei bi lông”.

H Nêč pô mblang