VOV4.Êđê - Hluê si Knơ̆ng bruă sang hră mtô bi hriăm čar Dak Lak, dŭm alŭ wăl hlăm čar dôk mjêč bi leh bruă mprăp kơ thŭn hriăm mrâo 2021-2022. Hlăm wưng êgao, dŭm alŭ wăl ăt ktuê dlăng, mbŏ kdrăp mnơ̆ng mtô bi hriăm, mnơ̆ng yua, mnơ̆ng hlăp lêñ, mkŏ mjing, mkra mđĭ kdrăp mnơ̆ng hlăm sang hră, adŭ hriăm. Boh nik, hlăm boh klei ruă tưp Covid-19 dôk dleh ktuê dlăng snăn bruă gang mkhư̆ klei ruă tưp leh anăn rơ̆ng êđăp ênang kơ hđeh sang hră, knuă druh, nai mtô dưi mđing tal êlâo.

Čiăng kkuh drông êbeh 400 čô hđeh mơ̆ng 10 adŭ hriăm gưl hđeh điêt thŭn hriăm 2021 – 2022, Sang hră gưl hđeh điêt Hoa Ban, ti să krĭng taih kbưi Čư̆ K’Bang, kdriêk knông lăn Êa Sup lŏ mkra leh dŭm adŭ hriăm, mmia êa mil mrâo kơ adŭ, bi mlih jhưng mdhô̆ hđăp, lŏ mkra anôk hlăp lêñ ti tač, bi mdoh jih wăl sang hră. Nai Nguyễn Thị Hóa – Khua sang hră brei thâo snei “Hlăm wưng anôk bruă sang čư̆ êa să ba yua sang hră ngă anôk bi ktlah mklin sa anôk pioh gang mkhư̆ klei ruă tưp snăn sang hră hnêč hŏng wưng anei ngă bruă hrŏng ruah mŭt hriăm. Truh hruê 20/8 leh êgao, anôk bruă sang čư̆ êa să lŏ jao wĭt sang hră snăn mmông anei sang hră mkŏ mjing leh hdră lŏ mkra mđĭ, krih êa drao bi mdjiê kman jih wăl sang hră. Kơ kdrăp mnơ̆ng yua mtô lehanăn bi hriăm, sang hră mâo leh gưl dlông mđing dlăng duh bi liê blei mprăp lu mta mnơ̆ng, lu anôk hlăp lêñ hlăm sang hră, 49 kdrăp jhưng mdhô̆ mrâo mbĭt hŏng lu kdrăp mnơ̆ng mkăn”.

Ti să knông lăn Êa Bung, nai Nguyễn Thành Đông – Khua sang hră gưl 2 Êa Bung brei thâo, thŭn hriăm 2021 – 2022 sang hră mâo 220 čô hđeh hriăm hră. Knhal jih mlan 7 mrâo êgao, să Êa Bung mâo 7 čô djŏ klei ruă Covid 19, alŭ wăl ba yua leh Asăp mtrŭn mrô 16 mơ̆ng Knŭk kna kñăm gang mkhư̆ klei ruă tưp. Kyua anăn, djăp hdră mprăp kơ thŭn hriăm mrâo êmưt hĕ. Leh wưng bi ktlah, hŏng klei đru mơ̆ng dŭm gưl mta bruă, hdră mprăp kơ thŭn hriăm mrâo dơ̆ng ngă ruê̆ ênŭm leh “Mrâo êgao sang hră mâo leh Anôk bruă sang čư̆ êa kdriêk duh prăk lŏ mkra 8 adŭ hriăm, hlăm anăn mâo 6 adŭ hriăm ti krĭng sang 2 tal lehanăn 2 adŭ hriăm ti sang 1 tal lehanăn ară anei mkra ruê̆ leh; bi ti anăp anei, srăng mkra sang ngă bruă kơ phung nai. Sang hră blei mprăp ênŭm leh kdrăp mnơ̆ng, hră m’ar mkăp kơ phung nai lehanăn hđeh yua kơ bruă mtô bi hriăm. Hmei hưn mthâo leh hŏng amĭ ama hđeh hluê kdrăp zalo, facebook kơ hdră kčah lŏ nao sang hră mơ̆ng Knơ̆ng bruă sang hră m’ar mtô bi hriăm hlăm hruê 1/9.

Kdriêk knông lăn Êa Sup ară anei mâo 48 sang hră mơ̆ng gưl hđeh điêt truh kơ gưl tlâo lehanăn sang hră mtô mjuăt nanao. Thŭn hriăm 2021 – 2022, dŭm sang hră mâo 19.350 čô hđeh. Hluê si Nguyễn Văn Khóa – Khua adŭ bruă sang hră m’ar mtô bi hriăm kdriêk Êa Sup, mprăp kơ thŭn hriăm mrâo, knŭk kna duh bi liê leh êbeh 12 êklai prăk lŏ mkra mrâo, mkra mđĭ anôk bruă nah gŭ hlăm sang hră. Truh ară anei, dŭm sang hră mprăp leh djăp ênŭm mnơ̆ng mnuă, anôk bruă nah gŭ, phung nai mtô kiă adŭ lehanăn hdră kčah bi hriăm, mprăp ênŭm kơ thŭn hriăm mrâo “Adŭ bruă Sang hră m’ar mtô bi hriăm kdriêk čih mkra leh hdră kčah hluê hŏng hră m’ar gĭt gai mơ̆ng gưl dlông čiăng pŏk hluê ngă truh kơ jih jang phung khua sang hră kơ bruă mtô lehanăn bi hriăm ăt msĕ mơh hdră gang mkhư̆ klei ruă tưp. Dŭm sang hră čih mkra leh hdră kčah ngă bruă, mkŏ mjing êpul gang mkhư̆ klei ruă tưp čiăng mŭt hlăm thŭn hriăm mrâo ba wĭt klei êđăp ênang kơ jih jang nai mtô, mnuih mă bruă lehanăn phung hđeh”.

Phạm Đăng Khoa, Khua knơ̆ng bruă sang hră m’ar mtô bi hriăm čar Dak Lak brei thâo, čiăng mprăp kơ thŭn hriăm mrâo 2021 – 2022, dŭm êpul êya sang hră ksiêm dlăng, lŏ thiăm mbŏ leh kdrăp mnơ̆ng yua hlăm bruă mtô lehanăn bi hriăm, mđing kơ dŭm mta bruă msĕ si adŭ hriăm, sang dlăng hră, sang tlô, hdră êa doh, rơ̆ng anôk bruă nah gŭ, kdrăp mnơ̆ng yua mtô bi hriăm hluê Hdră mtô bi hriăm mrâo hŏng adŭ 1,2 lehanăn adŭ 6; lŏ ksiêm dlăng, mkŏ dăp êpul nai mtô rơ̆ng mâo djăp ênoh nai, mâo klei thâo.

Čiăng rơ̆ng kơ knăm mphŭn pŏk thŭn hriăm mrâo 2021 – 2022 hluê si wưng kčah mâo leh Anôk bruă sang čư̆ êa čar ba mtrŭn, Anôk bruă sang čư̆ êa čar mtă kơ anôk bruă sang čư̆ êa dŭm kdriêk, wăl krah, ƀuôn prŏng hluê ngă hdră ksiêm dlăng jih jang mnuih ƀuôn sang dôk hluê ngă hdră bi ktlah ti alŭ wăl lehanăn ênoh anôk bruă sang hră m’ar mâo ba yua ngă anôk bi ktlah mơ̆ng alŭ wăl čiăng mâo alŭ wăl kriê dlăng čiăng lŏ mkŏ dăp wĭt anôk bi ktlah, lŏ jao wĭt sang hră mkăp kơ klei nao sang hră mơ̆ng phung hđeh. Phạm Đăng Khoa, Khua knơ̆ng bruă sang hră m’ar mtô bi hriăm čar Dak Lak brei thâo, hlăm wưng bluh mâo klei ruă Covid 19 tal 4 anei, Dak Lak mâo 113 anôk bruă sang hră mâo ba yua ngă anôk bi ktlah, đru kơ hdră ksiêm dlăng kman, tlŏ vaccine. Thŭn hriăm mrâo giăm truh, bruă mjêč ară anei jing rơ̆ng mâo djăp klei găl, êđăp ênang kơ phung hđeh lehanăn nai mtô hlăk klei ruă Covid 19 dôk mâo dleh dưi ksiêm dlăng. Boh nik ti sang hră mâo ba yua ngă bruă klam gang mkhư̆ klei ruă tưp “Anôk bruă sang čư̆ êa čar mâo leh hră m’ar mtă kơ dŭm alŭ wăl mdei bruă ba yua anôk bruă sang hră mkăp kơ hdră gang mkhư̆ klei ruă tưp čiăng dŭm sang hră mâo wưng bi mdoh, mkra mđĭ anôk bruă mprăp kơ thŭn hriăm mrâo. Hmei ăt ksiêm tĭng jih anôk bruă nah gŭ čiăng mkra mđĭ, blei mprăp mnơ̆ng kơ thŭn hriăm mrâo”.

Mbĭt hŏng anăn Knơ̆ng bruă sang hră m’ar mtô bi hriăm bi hgŭm hŏng Knơ̆ng bruă mdrao mgŭn hluê ngă jăk hdră bi mdoh, mdjiê kman djŏ si klei kčah mtrŭn lehanăn lŏ jao wĭt anôk bruă sang hră m’ar kñăm mprăp kơ hdră mphŭn pŏk thŭn hriăm mrâo rơ̆ng klei êđăp ênang kơ phung hđeh, nai mtô tơdah lŏ nao sang hră./.