VOV4.Êđê - Mŭt hlăm yan hjan angĭn êbŭ mbĭt hŏng bruă ksiêm dlăng nanao kdrăp mkăp pui kmlă, Anôk bruă pui kmlă Dak Lak mprăp ênŭm leh kdrăp mnơ̆ng, maĭ mŏk kñăm mdrơ̆ng hŏng djăp klei mâo. Êpul êya ăt mprăp mnuih mă bruă mdrơ̆ng hŏng djăp klei truh kbiă hriê mơ̆ng klei yan adiê ngă, tui duah, đru dŏng mnuih mâo klei truh mâo 40 čô mnuih, pral msir mghaih klei truh hlăm êlan pui kmlă.

Lê Văn, knuă druh thơ̆ng kơ adŭ bruă răng mgang klei êđăp ênang, Anôk bruă pui kmlă čar Dak Lak, brei thâo: “Ti alŭ wăl čar Dak Lak kreh mâo angĭn đrŭng hlăm akŏ yan lehanăn mâo dŭm krĭng ti kdriêk Krông Ana, Krông Bông, Čư̆ Kuiñ, Krông Pač dŭm thŭn êgao kreh mâo klei êngăp êa, bi krĭng Êa Sup, Ƀuôn Đôn kreh mâo hjan prŏng angĭn ktang..., hmei mkŏ mjing leh hdră kčah ngă bruă, nao ksiêm dlăng ti dŭm krĭng anei čiăng mkŏ bi kjăp êlan pui kmlă kñăm rơ̆ng klei êđăp ênang hlăm yan adiê angĭn êbŭ. Lehanăn amâo djŏ knŏng ti alŭ wăl anei ƀiădah păt čiăng jih krĭng wăl, anôk bruă pui kmlă Dak Lak mâo leh hdră kčah ngă bruă klă klơ̆ng, mprăp kdrăp mnơ̆ng ăt msĕ mơh mnuih mă bruă, êa drao gŭn lehanăn dŭm kdrăp mnơ̆ng yua đru dŏng hgŭm mbĭt hŏng alŭ wăl, bruă sang čư̆ êa čiăng mkăp lehanăn pral mâo hdră đru dŏng tơdah mâo klei truh mơ̆ng yan adiê ngă”./.

H Nêč pô mblang