VOV4.Êđê- Hŏng êbeh 260 čô mnuih ruă Covid-19 dưi ƀuh hlăm wưng bhiâo, kdriêk Krông Ƀŭk jing alŭ wăl mâo ênoh mnuih ruă Covid-19 lu hĭn ti čar Dak lak. Phung anei djŏ tuôm kơ anôk mâo klei ruă ti Ƀuôn Đrao, să Čư̆ Nĕ. Mta phŭn jing kyua mnuih ƀuôn sang amâo hluê ngă bi jăk hdră kčah 5 klei mtă gang mkhư̆ klei ruă tưp. Ară anei bruă sang čư̆ êa dŭm gưl kdriêk Krông Ƀŭk, čar Dak Lak hlăm bruă mđĭ ksiêm mkă, bi ksiêk phung ruă hlăm êpul êya đru hnưm msưh kdŭn klei ruă tưp ti alŭ wăl.

Truh ti ƀuôn Đrao, să Čư̆ Nĕ, kdriêk Krông Ƀŭk gưl 2, hmei ƀuh klei mđing răng tơdah bi tuôm hŏng pô mkăn, klei mđing uêñ kơ klei ruă tưp hlăm ƀô̆, hlăm ală mta mơ̆ng grăp čô mnuih ƀuôn sang ti anôk mă mta ksiêm dlăng pral kman klei ruă Covid 19. Djiêu gah anôk mă mta ksiêm dlăng anei, lu boh sang kđăl ƀăng kriêp êyăng, djiêu sang trŏng ksă leh, pra êyăn khua leh mơh ƀiădah kăn mâo pô nao pĕ. Kyua pô sang anei jing F0 s’aĭ dôk nao dŏng mdrao klei ruă Covid 19.

Y-Krŭ Ayŭn, K’iăng khua bruă Đảng, khua anôk bruă mặt trận ƀuôn Đrao brei thâo, 155 čô F0 êbeh 300 čô F1, truh giăm 1/3 ênoh mnuih hlăm ƀuôn bi nao dŏng mdrao lehanăn bi ktlah sa anôk jing klei amâo mâo pô čiăng ôh. Mta phŭn kbiă hriê klei tưp lar anei jing mâo dŭm čô mkŏ mjing klei huă mnăm jak iêu ƀĭng găp, găp djuê, sang djiêu gah nao čhưn mbĭt. Dŭm hruê êgao, dŭm êpul êya hlăm ƀuôn bi hgŭm hŏng êpul ba anăp, Êpul Covid 19 êul êya nao leh kơ grăp gŏ sang mtrŭt mjhar mnuih ƀuôn sang amâo dôk bi nghi lu mnuih, hluê ngă kjăp 5 asăp mtă kñăm gang mkhư̆ klei ruă. Hŏng hdră “Mtô mblang lu blư̆ snăn gơ̆ srăng kma” păt čiăng jih mnuih ƀuôn sang hlăm ƀuôn thâo săng lehanăn hluê ngă kjăp:

“Ară anei hluê si klei bhiăn pô jing jih ƀuôn, jih kdriêk, jih să mkă hŏng êlâo adih jing amâo dưi ôh. Êlâo dih mdê, ară anei mdê mơh kyua klei ruă tưp dôk mâo msĕ snei. Drei bi hrŏ jih yơh, tơdah mâo klei djiê brŭ ăt bi hrŏ mơh hdră mkŏ mjing, ênoh mnuih nao čang, amâo ngă msĕ êlâo ôh. Mơ̆ng leh mâo klei ruă anei, mnuih ƀuôn sang ăt huĭ mơh, mnuih ƀuôn sang mâo leh klei mđing hluê ngă kjăp hĭn.

Y-Krŭ Ayun dôk hâo hưn mtô mblang kơ mnuih ƀuôn sang ngă djŏ 5 klei mtă gang mkhư̆ klei ruă Covid-19

Trần Thuận, Khua anôk bruă mdrao mgŭn kdriêk Krông Ƀŭk brei thâo, hlăm 2 hruê kăm êgao, êpul mdrao mgŭn gĭr pŏk mlar leh hdră tui duah lehanăn ksiêm dlăng kman hlăm êpul êya gưl 1. Mơ̆ng anăn, mâo ksiêm mkă leh kơ êbeh 6 êbâo čô mnuih ti dŭm ƀuôn hlăm să Čư̆ Nĕ lehanăn Čư̆ Kpô. Hlăm wưng dôk kwang dar dŭm boh alŭ, ƀuôn lehanăn kluôm kdriêk dôk hluê ngă Asăp mtrŭn mrô 16 mơ̆ng Khua knŭk kna, anôk bruă mdrao mgŭn dôk bi hgŭm hŏng dŭm êpul ksiêm dlăng krĭng mnuih ƀuôn sang dôk “Amâo dưi mŭt kbiă” lehanăn lŏ hluê ngă hdră ksiêm mkă tal 2 ti dŭm anôk bluh mâo lu mnuih ruă. Hdră ksiêm mkă srăng ngă hŏng jih jang mnuih hlăm sang, điêt đuôt amâo lui wơr hlei pô ôh kñăm tui duah F0 hlăm êpul êya yang ƀuôn.

Trần Thuận, brei thâo, ară anei kdriêk Krông Ƀŭk dôk čih mkra hdră ksiêm dlăng kman Sar CoV2 pral kơ jih jang mnuih ƀuôn sang hlăm anăn mđing hluê ngă hŏng hlăm brô 4.000 čô mnuih ti kwar Dưr mơ̆ng kdriêk, dôk ti krah 2 să dôk mâo klei ruă tưp lu:

“Ară anei krĭng Dưr kdriêk Krông Ƀŭk dôk kpăk đuôm plah wah 2 krĭng dôk mâo lu mnuih ruă jing Êa Nam lehanăn Čư̆ Nĕ lehanăn ară anei mâo lu mnuih ƀuôn sang dôk hlăm krĭng anăn amâo djŏ klei ruă. Năng ai hlăm sa hruê plah wah dŭm boh ƀuôn hlăm krĭng anăn lehanăn să anei hŏng să mkăn srăng mđing ksiêm dlăng pral kman hlăm êpul êya mơ̆ng anăn kñăm prăl hmao ƀuh mnuih ruă hlăm êpul êya jăk hĭn.

Phung mă bruă mdrao mgŭn mă mta ksiêm mkă pral tal 2 kơ mnuih ƀuôn sang ƀuôn Đrao

Tĭng truh kơ ară anei, kdriêk Krông Ƀŭk mâo leh êbeh 240 čô mnuih djŏ kman Sar CoV2. Hlăm anăn, năng mđing jing 2 anôk bluh mâo klei ruă ti să Čư̆ Nĕ lehanăn să Čư̆ Kpô. Knŏng ti să Čư̆ Nĕ mâo truh 202 čô F0, lu jing ti ƀuôn Đrao lehanăn ƀuôn Ktơ̆ng Drun. Hluê si Hoàng Kiên Cường, Khua anôk bruă sang čư̆ êa kdriêk Krông Ƀŭk, ti anăp klei mâo dleh dưi ksiêm dlăng mơ̆ng klei ruă Covid 19, kdriêk gĭt gai leh dŭm êpul êya bruă, anôk bruă sang čư̆ êa nah gŭ mbĭt hŏng bruă hyuă kjăp hdră msir ksiêm dlăng, čuăl krĭng ti anôk mâo klei ruă snăn brei mtrŭt mđĭ ai, thâo klă klei akâo čiăng mơ̆ng mnuih ƀuôn sang lehanăn đru kơ mnơ̆ng ƀơ̆ng huă čiăng kơ mnuih ƀuôn sang h’ĭt ai tiê hluê ngă hdră bi ktlah. Mbĭt hŏng anăn, kdriêk mkŏ mjing êpul đru kơ mnuih ƀuôn sang čhĭ dŭm mta mnơ̆ng lŏ hma msĕ si boh ƀơr, boh durian hlăm wưng dôk mâo klei ruă, Kdriêk ăt brei dŭm gŏ êsei ngă bruă mnia mblei nao hrui blei mnơ̆ng lŏ hma kơ mnuih ƀuôn sang ƀiădah brei mâo klei bi mklă amâo mâo kman SARS-CoV-2.

Kơ dŭm hdră msir msưh kdŭn klei ruă Covid 19 Hoàng Kiên Cường brei thâo:

“Kdriêk srăng mđĭ dŭm hdră msir hâo hưn, mtô mblang, tal dua jing mđĭ hdră hiu ksiêm dlăng, tal tlâo jing tiŏ nao phung knuă druh ksiêm dlăng ti dŭm alŭ, ƀuôn čiăng kơ êpul djŏ tuôm mơ̆ng să lehanăn jih anôk bruă kđi čar ngă kjăp hdră kriê dlăng mnuih ƀuôn sang, rơ̆ng hlei dôk ti anôk hlŏng dôk tinăn yơh čiăng kơ hdră gang mkhư̆ klei ruă tưp mơ̆ng kdriêk dưi mâo boh tŭ kdlưn hĭn.

Mbĭt hŏng klei sa ai mơ̆ng mnuih ƀuôn sang, dŭm klei gĭr mơ̆ng anôk bruă mdrao mgŭn lehanăn klei hgŭm kngan mơ̆ng anôk bruă sang čư̆ êa alŭ wăl, čang hmăng kdriêk Krông Ƀŭk srăng hnưm dưi msưh kdŭn klei ruă Covid 19, ba wĭt klei hdĭp jăk ênang kơ mnuih ƀuôn sang./.

                                                    Pô mblang: H’Nêč Êñuôl