VOV4.Êđê- Trịnh Quang Trí, khua kiă kriê anôk bruă ksiêm dlăng klei ruă tưp čar Dak Lak brei thâo, anôk bruă tŭ mă leh 400.000 hnơ̆ng vaccine Vero Cell mơ̆ng Sinopharm. Hŏng ênoh vaccine dưi mkăp brei anei, čar Dak Lak srăng dưi tlŏ ênŭm 2 aruăt kơ 200.000 čô, knar hŏng 10% ênoh mnuih ƀuôn sang hlăm čar.

Anei jing hnơ̆ng vaccine lu hĭn mkă hŏng êlâo truh kơ ară anei čar Dak Lak tŭ mă hlăm bruă tlŏ mgang klei ruă tưp Covid-19. Tui si Trịnh Quang Trí, dlăng kơ klei ruă tưp hlăm alŭ wăl, ênoh vaccine anei srăng dưi tlŏ mgang kơ anôk mâo klei hyưt hĭn jing: ƀuôn prŏng Ƀuôn Ama Thuôt, wăl krah Ƀuôn Hồ, kdriêk Čư̆ Mgar, kdriêk Krông Ƀŭk leh anăn sa kdrêč ti kdriêk Čư̆ Kuiñ. Dŭm anôk bruă srăng dưi mkăp brei vaccine tui si ênoh mnuih ƀuôn sang, rơ̆ng kơ êpul tlŏ mgang tla êlâo ăt dưi tlŏ hlăm gưl anei.

Pô mblang: Y-Ƀel Êban