VOV4.Êđê - Mđing truh asăp iêu mthưr mơ̆ng dŭm gưl bruă Đoàn hlăm čar, lu phung đoàn viên êdam êra ti Dak Lak čŏng pô ngă hră m’ar nao hgŭm hlăm êpul đru gang mkhư̆ klei ruă Covid 19. Amâo uêñ klei dleh dlan, suaĭ êmăn, phung ba anăp dôk đru mguôp ai pô hlăm dŭm hdră bruă ti anôk bi ktlah mklin sa anôk, nao đru kơ phung nai aê mdrao lehanăn dŭm êpul mkăn đru hgŭm kngan msưh kdŭn kei ruă tưp.

Giăm 2 hruê kăm nao đru bruă hlăm anôk bi kltah mbĭt ti anôk bruă mdrao mgŭn kdriêk Krông Pač, amai Phan Ngọc Bảo Nhi, ti să Hoà An, kdrêk Krông Pač, čar Dak Lak mưng hĕ leh hŏng klei mă bruă hŏng kdrăp čŭt hơô bruă mdrao mgŭn wăt kơ mdiê mđiă ktang amâo dah hlĭm hjan. Jing sa čô nai mdrao mrâo bi ruê̆ klei hriăm gưl prŏng, kyuanăn amai mâo bruă klam jing đru hlăm bruă ksiêm mkă, mă mta ksiêm mkă kman kơ phung mrâo wĭt mơ̆ng anôk mâo klei ruă tưp.

Hlăm mrô đĭng blŭ, amai Phan Ngọc Bảo Nhi lač, ƀuh klei ruă tưp ti čar Dak Lak dleh êdi dưi ksiêm dlăng, ênoh mnuih mâo klei ruă tưp ƀrư̆ hruê ƀrư̆ đĭ, amai čŏng čih leh hră akâo lehanăn mơĭt klei čih hlăm đĭng blŭ kơ khua kiă kriê knơ̆ng bruă mdrao mgŭn čar Dak Lak čiăng nao hgŭm hŏng êpul ba anăp bruă gang mkhư̆ klei ruă tưp. Leh kơ anăn mtam, khua gĭt gai mâo leh klei wĭt lač lehanăn mơĭt hră akâo mơ̆ng amai kơ êpul gĭt gai bruă gang mkhư̆ klei ruă tưp gưl kdriêk dưi dăp anôk mă bruă kơ amai. “Kâo ƀuh klei ruă tưp ti čar Dak Lak kčưm bluh đĭ, ênoh mnuuh mâo klei ruă đĭ hlăm grăp hruê, kyuanăn kâo čiăng nao hgŭm hlăm bruă gang mkhư̆ klei ruă tưp čiăng đru kơ êpul ba anăp bruă gang mkhư̆ klei ruă tưp, kyuadah ti čar Dak Lak dôk kƀah mnuih ngă bruă. Lač klă, bruă mă jing lu êdi, mâo klei suăi lehanăn êmăn. Ƀiădah anei jing bruă mbĭt hŏng jih jang dưi nao hgŭm, kâo ƀuh mâo klei mơak mơh.”

Ăt jing sa čô čŏng nao hgŭm đru kơ bruă ti anôk bi ktlah mbĭt ti anôk bruă mdrao mgŭn kdriêk Krông Pač, bruă grăp hruê mơ̆ng ayŏng Nguyễn Tấn Huy ti alŭ 2, să Tân Tiến, kdriêk Krông Pač jing đru pŭ soai mnơ̆ng hlăm dŭm dŭ lehanăn kih waih bi doh anôk bi ktlah. Ayŏng Nguyễn Tấn Huy yăl dliê, Ayŏng dôk hriăm thŭn tal 2 ti sang hră gưl prŏng Khoa học Tự nhiên ƀuôn prŏng Hồ Chí Minh. Kyua klei ruă tưp, mơ̆ng mlan 5 ayŏng mdei sang hră leh wĭt kơ ƀuôn sang pô. Êjai êpul bruă Đoàn Kdriêk Krông Pač hâo hưn čiăng mâo pô čŏng nao ngă bruă, mâo klei tŭ ư mơ̆ng gŏ sang, ayŏng čih leh hră akâo nao lehanăn mâo klei tŭ ư nao đru bruă hlăm anôk bi ktlah mâo êbeh leh sa hruê kăm hŏng anei. “Gŏ sang mprăp leh ai tiê, kyuanăn leh mâo gưl ngă hră ăt gŏ sang brei nao msĕ yăng đar mơh, kyua klei čiăng đru kơ yang ƀuôn, ti nei bruă ngă ăt msĕ yăng đar mơh, ƀiădah hlăm alŭ wăl mâo knŏng ƀiă mnuih amâo mâo pô bi mlih tuôr mă bruă ôh. Tơdah phung ƀing găp čiăng nao hgŭm srăng mprăp ênŭm mnơ̆ng yua, mâo klei suaih pral jing jăk hĭn, mŭt ti nei klei hdĭp amâo msĕ hŏng dôk hlăm pưk sang, huă mbĭt lu mnuih, kyuanăn mâo lu klei mdê hĭn.”

Ayŏng Nguyễn Văn Hà, khua bruă Đoàn krdriêk Krông Pač brei thâo, leh kdriêk mâo mnuih ruă lehanăn mkŏ mjing dŭm anôk bi ktlah čiăng drông jum mnuih ƀuôn sang mrâo wĭt mơ̆ng anôk mâo klei ruă tưp, Kdriêk ngă hmar leh bruă mlih dŭm hdră êlan ngă bruă, ngă bruă gang mkhư̆ klei ruă tưp Covid-19 lehanăn bi hơĭt klei hdĭp tal êlâo hĭn. Nao mbĭt hŏng dŭ bruă anăn jing bruă đru kơ mnuih mâo klei dleh dlan, êpul bruă Đoàn iêu mthưr leh êpul cŏng nao ngă bruă đru kơ êpul ba anăp bruă gang mkhư̆ klei ruă tưp. Gưl tal êlâo mâo čô dưi mâo klei bi mklă tŭ ư nao ngă bruă hlăm dŭm anôk bi ktlah mơ̆ng kdriêk Krông Pač. “Mơ̆ng hruê mtrŭt mjhar truh kơ ară anei, hnơ̆ng hđeh êdam êra, êpul bruă Đoàn čih hră kâo nao đru ênŭm leh hnơ̆ng mơ̆ng êpul bruă Đoàn hlăm kdriêk, hmei ăt ngă bi klă hdră ngă bruă, mơ̆ng klei čih hră akâo truh kơ klei tŭ ư mơ̆ng gŏ sang, alŭ wăl, anôk bruă hưn brei. Bi tuôm klă anăn hŏng grăp čô čŏng nao ngă bruă, hmư̆ klei di ñu yăl dliê, klei diñu čiăng lehanăn dưi mkŏ mjing dŭm êpul êya, ba jao kơ dŭm anôk bruă čiăng mâo klei dăp bruă mă, mtô kơ diñu ngă bruă mâo boh tŭ dưn hĭn hŏng dŭm bruă pô čŏng ngă.”

Ti kdriêk Čư̆ Mgar, mơ̆ng knhal jih mlan 7 leh êgao, knŏng ƀiă hruê hâo hưn čiăng mâo phung čŏng nao ngă bruă, êpul khua bruă Đoàn mâo leh lu hră akâo nao ngă bruă hŏng “êpul ao mtah”. Tui si ayŏng Y Wal Mlô, khua bruă Đoàn Kdriêk Čư̆ M’Gar, hlăm kdriêk lŏ wĭt ngă bruă leh mơ̆ng 18 êpul ao mtah 2 gưl kdriêk lehanăn să hŏng 280 čô čŏng nao ngă bruă čiăng đru kơ bruă gang mkhư̆ klei ruă tưp, mprăp mnơ̆ng dhơ̆ng yua hlăm dŭm anôk bi ktlah mbĭt. Hlăm êpul gưl kdriêk dưi tŭ mă leh hră akâo čŏng nao ngă bruă mơ̆ng êbeh 50 čô. Bruă Đoàn hlăm kdriêk ngă leh hră anăn diñu, mkŏ mjing klei mtô mjuăt lehanăn dăp anôk ngă bruă kơ diñu.“Lu ƀĭng găp hlăm êpul dôk hlăk thŭn mda êdi, mâo pô mrâo bi ruê̆ klei hriăm gưl 3 čŏng nao hgŭm đru kơ êpul ba anăp bruă gang mkhư̆ klei ruă tưp Covid-19 hlăm kdriêk. Dưi ƀuh hlăm diñu ai tiê hur har, čŏng mprăp nao ngă bruă, gui lu bruă suăi, bruă mrâo mơ̆ng dŭm čô hđeh êdam êra lehanăn Đoàn Viên hlăm kdriêk Čư̆ mgar dưi bi lar nanao. Klei anei brei ƀuh bruă ngă, bruă klam mơ̆ng êpul hđeh êđam êra hlăm bruă hrăm mbĭt hŏng bruă Đảng nah gŭ, bruă sang čư êa alŭ wăl gang mkhư̆ klei ruă tưp.”

Hŏng klei mĭn “Amâo čŏng nao ngă bruă mmông anei, ti hruê mmông lŏ nao”, mâo lu phung Đoàn Viên, hđeh êdam êra mrâo bi ruê̆ klei hriăm gưl 3 čŏng akâo nao hgŭm hŏng êpul ba anăp bruă gang mkhư̆ klei ruă tưp Covid-19. Wăt yang hruê amâo dah mmăt mlam, hjan hlĭm lu klei suăi, hrăm mbĭt hŏng êpul êya mkăn, hđeh êdam êra čar Dak Lak dôk jih ai hŏng dŭm bruă ngă klă klơ̆ng čiăng hrăm mbĭt bi mjưh klei ruă tưp.