VOV4.Êđê - Mrâo anei, Khua knŭk kna mtă kơ bruă êlan klông dŭ mdiăng dŭm čar, ƀuôn prŏng hlăm kluôm ala pŏk êlan êngiê mkăp mrô QR Code đru kơ anôk bruă dŭ mdiăng, ba čhĭ mnơ̆ng dhơ̆ng lŏ hma leh anăn mnơ̆ng yua aguah tlam. Mơ̆ng knhal jih mlan 7/2021 truh ară anei, Knơ̆ng bruă êlan klông dŭ mdiăng čar Dak Lak mkăp leh êbeh 2 êbâo mrô QR Code “êlan êngiê” kơ êdeh êdâo kñăm đru kơ anôk bruă dŭ mdiăng boh mnga lŏ hma, ƀĭng ngă lŏ hma găl ênưih hĭn hlăm bruă dŭ mdiăng ba čhĭ mnơ̆ng dhơ̆ng lŏ hma leh anăn mnơ̆ng yua aguah tlam.

Đặng Quang Điện- khua kiă kriê êpul bi mguôp bruă mnia mblei lehanăn dŭ mdiăng 63 čar, ƀuôn prŏng, ti Dak Lak lač, knơ̆ng bruă mâo 45 boh êdeh dŭ mdiăng dŭm mnơ̆ng dhơ̆ng jing boh mnga bruă lŏ hma, boh kroh hlăm dŭm čar krĭng Lăn Dap Kngư nao kơ dŭm čar krĭng dưr lehanăn ƀuôn prŏng phŭn Hà Nội. Êjai ƀuôn prŏng Hà Nội lehanăn dŭm čar dôk ngă klei bi kbưi yang ƀuôn tui si hdră mtrŭn mrô 16 mơ̆ng khua knŭk kna, bruă dŭ mdiăng mnơ̆ng dhơ̆ng ăt mâo klei êmưt kyua ngă dŭm hdră êlan gang mkhư̆ klei ruă tưp Covid-19. Hlăk knhal jing mlan 7 leh êgao, knơ̆ng bruă dŭ mdiăng hlăm êlan klông čar Dak Lak ngă bruă pŏk êlan êngiê, brei mrô QR Code kơ êdeh dŭ mdiăng mơ̆ng knơ̆ng bruă, kyua năn mâo klei găl hĭn đru bi hluh êlan dŭ mdiăng tơdah truh hlăm dŭm alŭ wăl ngă klei bi kbưi yang ƀuôn tui si hdră mtrŭn mrô 16 mơ̆ng khua knŭk kna. “Tui si klei hâo hưn mơ̆ng anôk bruă djŏ tuôm kơ bruă brei mrô QR Code dŭ mdiăng dŭm mta mnơ̆ng yua mjêč, hmei ngă leh klei bi klă hlăm mbah Internet, lehanăn klei ngă jing ênưih mơh. Leh ngă klei bi klă êlan êngiê dưi lŏ mâo mrô QR Code ti knơ̆ng bruă dŭ mdiăng hlăm êlan klông čar Dak Lak, leh kơ anăn êdeh hmei mâo sa pŏk kak čiăng thâo krar êdeh hlăm brô 1 truh kơ 2 mmông leh ngă klei bi klă. Leh mâo hră kak anăn, bruă dŭ mdiăng mnơ̆ng dhơ̆ng mjêč găn nao dŭm anôk gak răng hlăm čar ăt msĕ hŏng dŭm čar, ƀuôn prŏng mkăn mâo klei hmar lehanăn jăk hĭn. Êngao kơ anăn, jih jang phung ayŏng adei mgăt êdeh hlăm knơ̆ng bruă dưi mâo klei đru ksiêm mkă kman hmar hlăm anôk gak răng gang mkhư̆ klei ruă tưp Covid-19 amâo luič prăk lehanăn lu mnĭt mmông ôh.”

Čar Dak Lak mâo 6 bĭt êlan dơ̆ng prŏng msĕ si: Êlan dơ̆ng mrô 14 (êlan dơ̆ng prŏng Hồ Chí Minh), 14C, 26, 27, 19 lehanăn 29 găn nao dŭm čar, Lâm Đồng, Gia Lai, Dak Nông, Khánh Hoà lehanăn Phú Yên. Ară anei jih jang êlan dơ̆ng anei mâo sơăi anôk gak răng gang mkhư̆ klei ruă tưp Covid-19, ksiêm dlăng mnuih lehanăn êdeh êdâo mŭt kbiă hlăm alŭ wăl čar.

Trung tá Đặng Thanh Hòa – knuă druh ksiêm dlăng hlăm êlan klông, anôk bruă kahan ksiêm êlan klông kriêk Krông Ƀŭk, kahan ksiêm čar Dak Lak brei thâo, hlăm anôk gak răng gang mkhư̆ klei ruă tưp Covid-19 ti kang êlan tĭng ngŏ dưr hlăm čar jing kban 110 mơ̆ng să Ea H’Leo, kdriêk Ea H’Leo bi knông hŏng čar Gia Lai, kah knar grăp hruê mâo dŭm êtuh boh êdeh êdâo lehanăn dŭm êbâo čô mnuih mŭt kbiă hŏng čar Dak Lak. Êjai dŭm boh êdeh mâo hră kak bi klă thâo kral êdeh mâo mrô QR Code dôk mâo hruê yua mơ̆ng knơ̆ng bruă dŭ mdiăng hlăm êlan klông mkăp brei srăng dưi ngă klei ksiêm dlăng êlâo lehanăn brei êdeh anăn nao hmar hĭn. “Anôk bruă ksiêm dlăng hlăm êlan klông kdriêk Krông Ƀŭk dăp leh mnuih ngă bruă 24/24 čiăng rơ̆ng klei êđăp ênang hlăm êlan klông ăt msĕ hŏng bruă klei đru kơ bruă gang mkhư̆ klei ruă tưp Covid-19. Tui ngă klei gĭt gai êlan mtah mơ̆ng khua knŭk kna, jih jang mnuih ngă bruă srăng ksiêm dlăng hŏng mrô QR code, tơdah anôk bruă mâo ênŭm hră anăn, hruê mmông dôk dưi yua, hmei srăng ngă klei găl brei êdeh anăn găn anôk găk răng.”

Tui si Lê Đình Minh, k’iăng khua kiă kriê knơ̆ng bruă dŭ mdiăng hlăm êlan klông čar Dak Lak, ngă bruă gĭt gai mơ̆ng knŭk kna ăt msĕ hŏng phŭn bruă dŭ mdiăng hlăm êlan klông đru kơ dŭm anôk bruă mnia mblei, dŭ mdiăng mnơ̆ng dhơ̆ng mjêč, knơ̆ng bruă hâo hưn leh kơ dŭm anôk bruă dŭ mdiăng čar Dak Lak bi mklă ngă mrô QR Code kơ dŭm boh êdeh čiăng mâo klei ênưih hlăm bruă dŭ mdiăng hlăm dŭm êlan êngiê.

Bruă bi klă brei mrô QR Code êlan êngiê dưi ngă truh kơ tuič ruĕ hŏng kdrăp dưn yua điện tử hlăm mbah internet, hŏng klei ngă bruă ênưih, hmar lehanăn ka mâo ôh mkrah aguah dưi mâo mrô yơh. Lê Đình Minh lač. “Yap truh kơ ară anei, hmei brei leh 2.036 mrô QR code kơ dŭm boh êdeh dŭ mdiăng mnơ̆ng yua mjêč nao pha dŭm čar, ƀuôn prŏng hlăm ala čar. Knơ̆ng bruă ksiêm dlăng hlăm êlan klông lŏ hâo hưn lehanăn mtă kơ dŭm knơ̆ng bruă dŭ mdiăng nao bi klă mă mrô QR code “êlan êngiê” čiăng mâo klei ênưih hlăm bruă dŭ mdiăng dŭm mnơ̆ng yua mjêč hlăm wưng klei ruă tưp dôk dleh dưi ktuê dlăng hlăm čar lehanăn ala čar. Hmei dăp leh mnuih mă bruă 24/24 lehanăn 7/7 knăm hlăm hruê kăm brei mrô kơ dŭm anôk bruă dŭ mdiăng. Knơ̆ng bruă knŏng mơĭt hră mơar lehanăn guôn hlăm brô 1 -2 mmông srăng mâo mrô đru kơ bruă dŭ mdiăng dưi hmăr hĭn.