VOV4.Êđê- Čar Dak Lak hruê 24/11 tŭ mă leh 64.250 hnơ̆ng vaccine Comirnaty mơ̆ng Pfizer-BioNTech mâo Phŭn bruă mdrao mgŭn mkăp čiăng pŏk hdră tlŏ kơ phung hđeh mơ̆ng 12 truh kơ 17 thŭn. Čar srăng pŏk hdră tlŏ vaccine anei hlăm mlan 11 anei mtam. Hluê hŏng ênoh vaccine mâo mkăp, Dak Lak srăng hluê ngă hdră tlŏ mgang mơ̆ng gưl thŭn prŏng hĭn tal êlâo.

Snăn, hŏng êbeh 64 êbâo hnơ̆ng vaccine mâo mkăp hlăm gưl anei, čar srăng tlŏ kơ jih jang phung hđeh hriăm hră gưl tlâo. Anôk tlŏ mgang dưi hluê ngă ti sang hră hđeh hriăm mtam, phung hđeh ti sang hră hriăm srăng dưi tlŏ ti snag hră anăn, hdră mkŏ mjing klei tlŏ mgang brei rơ̆ng kjăp 5 asăp mtă kơ hdră gang mkhư̆ klei ruă Covid 19. Ară anei, anôk bruă mdrao mgŭn čar Dak Lak dôk mjuăt bi hriăm kơ jih jang mnuih mă bruă mdrao mgŭn kơ hdră tlŏ vaccine kơ phung hđeh djŏ si klei kčah mtrŭn mơ̆ng Phŭn bruă mdrao mgŭn./.

Pô mblang: H’Nêč Êñuôl