VOV4.Êđê- Ti anăp klei dleh ktuê dlăng mơ̆ng klei ruă Covid-19, yap mơ̆ng hruê 15/9 truh ară anei, wăl krah Ƀuôn Hồ, čar Dak Lak, mâo nanao mnuih ruă Covid-19 hlăm êpul êya ka thâo ôh phŭn mtưp. Tlam 17-9, Knơ̆ng bruă mdrao mgŭn čar Dak Lak bi hgŭm hŏng Anôk bruă mdrao mgŭn wăl krah Ƀuôn Hồ pŏk ngă mă mta ksiêm mkă hluê si hdră test pral leh anăn RT-PCR hŏng mnuih ƀuôn sang ti 4 ƀuôn hgŭm dôk hlăm krĭng mâo klei tưp lu ti wăl krah Ƀuôn Hồ.

Hluê anăn, mơ̆ng hruê anei 18-9, bruă mdrao mgŭn srăng ksiêm mkă ti 4 ƀuôn hgŭm ti wăl krah Ƀuôn Hồ mâo: Ƀuôn hgŭm An Lạc, An Bình, Thiện An leh anăn Đạt Hiếu. Wưng mă mta ksiêm mkă srăng mkŏ mjing hlăm wang 7 hruê ( mơ̆ng hruê 18-9 truh hruê 24/9). Mĭn tĭng mâo hlăm brô 33 êbâo 77 čô mnuih/ 8.917 gŏ êsei dưi mă mta ksiêm mkă hlăm gưl anei. Yap truh tlam 17-9, wăl krah Ƀuôn Hô mâo 180 čô djŏ kman SARS-CoV-2, 1 čô mnuih djiê. Năng mđing, mơ̆ng hruê 15/9/2021 truh 5 mmông tlam 17/9/2021 wăl krah Ƀuôn Hồ mâo 47 čô mnuih ruă Covid-19 hŏng dŭm êpul ryă djŏ tuôm kơ dŭm anôk blei boh mnga lŏ hma ti alŭ wăl.

Pô mblang: H’Zawut Ƀuôn Yă