VOV4.Êđê - Knơ̆ng bruă jia čar Dak Lak brei thâo, khă gơ̆ akŏ thŭn truh ară anei klei ruă Covid-19 dleh ktue dlăng hmaĭ lu kơ bruă duh mkra mnia blei, khădah knơ̆ng bruă jia čar hrui mă leh êbeh 2.688 êklai prăk, mâo 63% hdră mĭn tĭng gưl dlông jao leh anăn đĭ 14% mkă hŏng wưng anei thŭn dih. Hluê si Ngô Việt Hồng –  K’iăng Khua knơ̆ng bruă jia čar Dak Lak, mta phŭn hnơ̆ng hrui wĭt knŭk kna đĭ ktang kyua dŭm ênoh hrui mă mơ̆ng dŭm mta bruă pui kmlă êran hŏng pil yang hruê đĭ lu; mnơ̆ng dhơ̆ng ƀiêr, kpiê, êa mmih ăt đĭ lu mkă hŏng dŭm thŭn êlâo, êngao anăn, prăk jia mơ̆ng bruă mưn lăn, răng mgang wăl hdĭp mda, anôk mkra mjing… ăt đĭ. Mơ̆ng ară anei truh knhal jih thŭn, Knơ̆ng bruă jia čar Dak Lak lŏ dơ̆ng ktuê dlăng gĭt gai mơ̆ng gưl dlông pŏk ngă dŭm boh phŭn hrui mă prăk jia, mđĭ ktang klei bi hgŭm hŏng bruă sang čư̆ êa dŭm alŭ wăl hlăm bruă ksiêm dlăng čiăng kơ bruă hrui mă prăk jia, nư jia mâo klei tŭ dưn.

H Zawut pô mblang