VOV4.Êđê - Klei bi lông hriăm jih gưl 3 thŭn 2021, Dak Lak mâo êbeh 19.800 čô bi lông čih anăn ti 32 anôk bi lông, hŏng 830 adŭ bi lông. Knơ̆ng bruă sang hră - mtô bi hriăm čar Dak Lak ba nao êbeh 2.700 čô mnuih nao ngă bruă hlăm klei bi lông. Hlăm anăn êbeh 2.250 čô knuă druh, nai mtô dlăng klei bi lông. Ară anei bruă Sang hră hlăk bi hriăm klei bhiăn, bi hriăm kơ knuă druh, nai mtô, mnuih mă bruă dlăng klei bi lông. Ti anăp klei ruă Covid-19 dleh ktuê dlăng, Knơ̆ng bruă sang čư̆ êa čar Dak Lak gĭt gai leh Knơ̆ng bruă sang hră mtô bi hriăm ksiêm dlăng kơ phung bi lông, phung nao hlăm klei bi lông brei hluê ngă bi djŏ dŭm klei kčah mtrŭn kơ hdră gang mkhư̆ klei ruă Covid-19 mơ̆ng bruă mdrao mgŭn, mkhư̆ nao ti anôk amâo čiăng êdi. Bruă sang hră - mtô bi hriăm pral bi hgŭm hŏng Knơ̆ng bruă mdrao mgŭn, Knơ̆ng bruă sang čư̆ êa dŭm kdriêk, wăl krah, ƀuôn prŏng leh anăn dŭm anôk bruă djŏ tuôm thâo boh klei ruă tưp čiăng pŏk ngă mkŏ mjing klei bi lông ti čar bi djŏ guôp, rơ̆ng êđăp ênang kơ phung bi lông leh anăn jih jang phung đru hlăm klei bi lông.

H Zawut pô mblang