VOV4.Êđê- Hlăm wưng giăm anei mâo dŭm pluh êbâo čô mnuih mơ̆ng dŭm čar nah Dhŭng wĭt kơ Dak Lak. Dŭm êpul gang mkhư̆ klei ruă Covid-19 hlăm êpul êya mđĭ lar klei tŭ dưn, hâo hưn mtô mblang leh anăn ktuê dlăng mnuih ƀuôn sang ngă jăk bruă gang mkhư̆ klei ruă tưp mơ̆ng grăp gŏ sang.

Ƀuôn H’Luk, să Ea Tiêu. Kdriêk Čư̆ Kuiñ, čar Dak Lak mrâo mâo giăm 20 čô mnuih ƀuôn sang mrâo wĭt mơ̆ng dŭm čar krĭng dhŭng, dôk bi ktlah ti sang. Y-Nguă Ƀuôn yă, khua êpul Covid yang ƀuôn ti ƀuôn H’Luk brei thâo: Êpul mâo bruă klam ksiêm dlăng phung dôk bi ktlah ti sang amâo dah hlăm pưk hma, leh anăn mtă kơ mnuih ƀuôn sang hlăm ƀuôn amâo kbiă hiu tơdah amâo mâo bruă mjêč, bi tuôm hŏng mnuih mkăn, ngă djŏ 5 klei mtă mơ̆ng phŭn bruă mdrao mgŭn. Y-Nguă Ƀuôn Yă mâo sa čô anak mniê mrâo wĭt mơ̆ng anôk mâo klei ruă tưp ăt ngă sơnăn mơh.

“Anak mniê leh anăn mtâo kâo nao mă bruă ti Bình Dương, mmông wĭt mâo klei bi klă mơ̆ng bruă sang čư̆ êa să brei bi ktlah 14 hruê ti sang, amâo dưi kbiă ti tač ôh, amâo dưi bi tuôm hŏng ƀuôn sang jĕ giăm. 2 ung mô̆ dôk sang mdê, bi ktlah mâo 2 čô ung mô̆ đuič. Bi kơ braih huă, djam ƀơ̆ng iêo kơ hmei hŏng đĭng blŭ leh anăn hmei nao ba kơ diñu, ăt kăn mjĕ giăm hŏng diñu leh.”

Mkŏ mjing anôk gang mkhŭ klei ruă tưp hlăm grăp boh ƀuôn

Ƀuôn H’Luk mâo hlăm brô 150 gŏ sang, ƀiădah mâo truh kơ 5 êpul Covid yang buôn, klei mrâo mơ̆ng klei ruă tưp dưi hưn mthâo nanao mơ̆ntg dŭm êpul anăn, mnuih ƀuôn sang mâo leh klei thâo săng ngă djŏ 5 klei mtă gang mkhư̆ klei ruă tưp. Msĕ hŏng klei dơr djiê, ngă mă pral leh anăn knŏng ƀiă mnuih. Y-Sač Ƀkrông, khua ƀuôn ti ƀuôn H’Luk brei thâo:

“Djiê hruê anei mgi dơr yơh, mnuih ƀuôn sang hriê čang leh anăn wĭt yơh, amâo duah dôk sui ôh. Mâo klei mlih lu êdi, hmar leh anăn amâo liê lu prăk kăk, hruê mmông. Kyua čiăng gang mkhư̆ klei ruă tưp, ya mta dleh đei pô bi lui hĕ yơh. Ară anei dah lŏ bi kdung 3,4 hruê, ktang lu hruê ktang liê lu prăk kăk. Tal 2 diñu ăt thâo săng, dŏ anei dŭm mâo dŭm ngă yơh, knŏng ayŏng amai adei đuič dôk mă, amâo lŏ bi dôk lu mnuih msĕ êlâo ôh.”

Kdriêk Čư̆ Kuiñ jing anôk tal êlâo hĭn ti čar Dak Lak mâo klei ruă tưp bluh đĭ hlăm buôn sang mnuih djuê ƀiă. Kdriêk mâo leh klei dưi hlăm bruă ksiêm dlăng klei ruă tưp, lŏ wĭt klei msĕ aguah tlam mrâo mơ̆ng knhal jih mlan 8. Čiăng kơ mnuih ƀuôn sang mâo nanao klei thâo săng hlăm bruă gang mkhư̆ klei ruă tưp Covid-19, dŭm êpul Covid yang ƀuôn jing phung ktuê dlăng, ksiêm dlăng grăp hruê, čiăng hâo hưn, mtô lač. Grăp êpul mâo mơ̆ng 4 truh kơ 5 čô ngă bruă, jing phung mâo klei đăo knang hlăm ƀuôn sang, Đảng Viên, phung êpul êya knuă druh, bruă sang čư̆ êa să: Y-Min Êñuôl, khua bruă Đảng hlăm să Êa Tiêu, kdriêk Čư̆ Kuiñ lač:

“Mbha kơ grăp čô ksiêm dlăng sa alŭ wăl, sa alŭ, ƀuôn, boh tŭ dưn êpul covid yang ƀuôn srăng hưn mdah hŏng bruă sang čư̆ êa să, khua bruă Đảng hlăm să. Sĭt mâo êpul, alŭ, ƀuôn amâo ngă djŏ srăng hưn mdah mtam čiăng hdră mgaih msir, ƀuah mkra. Hlăm êpul Covid yang ƀuôn, phung ayŏng adei nao ngă bruă mâo uêñ kơ hjan mđiă, măt mlam. Kyua anăn mrâo anei êpul ngă bruă jăk êdi.”

Êpul gang mkhŭ klei ruă Covid-19 hlăm êpul êya ti ƀuôn Hluk

Lê Thái Dũng, khua bruă Đảng kdriêk Čư̆ Kuiñ brei thâo: Knŏng sa hruê kăm, alŭ wăl mâo êbeh 1.000 čô mrâo wĭt mơ̆ng dŭm čar krĭng dhŭng, hlăm wưng klei ruă tưp dôk dleh dưi ksiêm dlăng, kdriêk mkŏ mjing leh truh kơ 547 êpul covid yang ƀuôn. Ară anei dŭm êpul anei dôk bi lar boh tŭ dưn hlăm klei ngă bruă, bi ktlah phung mrâo wĭt kơ alŭ wăl.

“Mkŏ mjing 547 êpul Covid yang ƀuôn hlăm kluôm kdriêk leh anăn bi mbha điêt, grăp êpul srăng ksiêm dlăng mơ̆ng 20 truh kơ 30 gŏ sang, boh nik jing phung mrâo wĭt mơ̆ng dŭm čar krĭng dhŭng, anôk mâo klei ruă tưp wĭt hlăm dŭm alŭ ƀuôn. Kdriêk Čư̆ Kuiñ tĭng mkă “bi mdrơ̆ng hŏng klei ruă tưp hŏng mnêč” jing bi mbha điêt hlăm grăp alŭ ƀuôn leh anăn kơh truh kơ să, dah dleh đei truh kơ kơ kdriêk.”

 Bruă rŭ mdơ̆ng kđông gang mkhư̆ klei ruă tưp mơ̆ng ƀuôn sang mbĭt hŏng dŭm hdră êlan ktang phĭt, dưi đru leh kơ kdriêk Čư̆ Kuiñ mâo leh sa mlan mkrah amâo lŏ mâo mnuih mâo klei ruă tưp Covid-19 hlăm êpul êya yang ƀuôn.

Pô mblang: Y-Ƀel Êban