VOV4.Êđê- Leh giăm sa hruê kăm mdei bruă ksiêm mkă kman Covid-19 ti sang êa drao ƀuôn prŏng Ƀuôn Ama Thuôt, sang êa drao kơ hđeh Đức Tâm lehanăn adŭ mdrao mgŭn Hoàn Hảo, hruê 13/7, knơ̆ng bruă mdrao mgŭn čar Dak Lak tŭ ư leh lŏ brei kơ 3 anôk bruă anei lŏ wĭt ngă bruă ksiêm mkă kman Covid-19 čiăng ngă hră êrô êbat kơ mnuih ƀuôn sang lehanăn dŭm čô mgăt êdeh nao truh kơ alŭ wăl mkăn čiăng mâo leh klei ksiêm mkă kman lehanăn amâo mâo ƀuh kman ôh. Êlâo kơ anăn, hruê 8/7, knơ̆ng bruă mdrao mgŭn čar Dak Lak mâo leh hdră mtrŭn mrô 2306 kơ bruă brei mdei dŭm klei ksiêm mkă kman Covid-19 hlăm dŭm anôk mdrao mgŭn hlăm alŭ wăl, čiăng kơ knơ̆ng bruă mdao mgŭn bi klă, ti anôk bruă mâo ênŭm hnơ̆ng čuăn kơh dưi lŏ ngă bruă ksiêm mkă kman. Mbĭt hŏng 3 anôk bruă anăn dưi lŏ wĭt ngă bruă ksiêm mkă kman Covid-19, Dak Lak lŏ mâo dŭm anôk ksiêm mkă kman hmar 100 čô/hruê kơ dŭm čô mgăt êdeh mâo hră dưi mgăt êdeh hnơ̆ng C ti anôk mdrao mgŭn ƀuôn prŏng Ƀuôn Ama Thuôt.

Pô mblang: Y-Ƀel Êban