VOV4.Êđê - Aguah ưm hruê 30-7, čar Dak Lak drông giăm 900 čô mnuih wĭt mơ̆ng Đồng Nai. Anei jing gưl tal êlâo Dak Lak drông mnuih ƀuôn sang. Mơ̆ng bruă test pral, mâo 4 čô mnuih djŏ kman Sars-Cov-2, dŭm hdră mdrao mgŭn lŏ dơ̆ng ksiêm mkă phung đing djŏ klei ruă. Giăm 900 čô mnuih mă bruă ti Đồng Nai luič bruă mă kyua Covid-19 bluh mâo leh anăn mâo klei čiăng mgăt êdeh p’phŭt wĭt kơ Dak Lak.

Phung anei čih anăn hŏng anôk bruă djŏ tuôm čar Đồng Nai leh anăn dưi wĭt, leh arăng test pral amâo djŏ ôh Covid-19, čiăng rơ̆ng amâo dôk jưh ti dŭm anôk ktuê dlăng. Leh anăn, kahan ksiêm êlan klông hŏng dŭm êpul djŏ tuôm mâo kahan ksiêm răng mgang klei êđăp ênang, êpul aê mdrao čar Đồng Nai mkŏ mjing êpul nao atăt hlăm ktuê êlan giăm 400 km. Snăn, anei jing gưl tal êlâo Dak Lak mkŏ mjing klei drông phung wĭt mơ̆ng krĭng mâo klei ruă tưp. Êlâo anăn, čar ăt čih yap mâo lu mnuih čŏng wĭt hŏng êdeh p’phŭt mơ̆ng ƀuôn prŏng Hồ Chí Minh, Bình Dương leh anăn dŭm čar nah Dhŭng.

H Zawut pô mblang