VOV4.Êđê - Ti anăp klei ruă tưp Covid-19 dleh ktuê dlăng, kñăm rơ̆ng klei êđăp ênang kơ mnuih ruă, phung ngă bruă mdrao mgŭn leh anăn êpul êya, bruă mdrao mgŭn Dak Lak hlăk mjêč mđĭ ktang dŭm hdră gang mkhư̆ leh anăn ktuê dlăng tưp lar klei ruă Covid-19 hlăm dŭm anôk bruă mdrao mgŭn.

Ti sang êa drao prŏng krĭng Lăn dap kngư, hdră gang mkhư̆, mdrơ̆ng hŏng klei ruă Covid 19 dưi krơ̆ng kjăp, mâo ksiêm dlăng nanao hluê si klei bi mklă mrô 3088/QĐ-BYT mơ̆ng Phŭn bruă mdrao mgŭn kčah mtrŭn kơ ‘’Hdruôm hnơ̆ng čuăn Sang êa drao êđăp ênang hlăm hdră gang mkhư̆, mdrơ̆ng hŏng klei ruă tưp Covid 19 lehanăn dŭm klei ruă hlăm êlan bi êwa kjham”. Hluê anăn, čiăng rơ̆ng hnơ̆ng čuăn “Sang êa drao Êđăp ênang”, hdră kah mbha êlan găn êrô mdê mkăp kơ bruă ksiêm dlăng, bi mklă mnuih ruă pral dưi hluê ngă. Jih jang mnuih mŭt hlăm sang êa drao tal êlâo hĭn brei hưn mthâo klei suaih pral lehanăn ksiêm dlăng hnơ̆ng hlơr asei mlei. Ti ƀăng jang sang êa drao mâo pŏk mdhă ktrâo lač, hŏng mnuih mâo klei bi êdah mtŭk, êngoh, ƀlĕ êa dŭng, ruă kŏng đŏk, ruă hnư̆ đah da, dleh bi êwa, êgah êgăn dưi nao êlan mdê lehanăn dưi ksiêm mkă ti adŭ mdrao klei ruă Covid 19 giăm ƀăng jang, rơ̆ng amâo mâo lui mnuih đing mâo klei ruă mŭt hlăm sang êa drao. Pô ruă, găp djuê mnuih ruă tơdah mŭt hlăm sang êa drao brei hluê ngă kjăp hdră kah mbha êlan nao, truă čhiăm guôm ƀô̆, amâo kčuh êa bah ča čuăt, amâo bi kƀĭn lu mnuih, dôk kbưi hŏng pô mkăn ƀiă êdi 2m.

Hluê si Aê mdrao Võ Minh Thành, K’iăng khua Sang êa drao prŏng krĭng lăn dap kngư, hŏng klei mprăp djăp ênŭm, kah mbha bruă klam klă klơ̆ng mbĭt hŏng dŭm hdră ngă mđrăm mbĭt kơ bruă, êa drao gŭn, kdrăp mnơ̆ng, hdră hâo hưn. Sang êa drao mprăp nanao hdră mdrơ̆ng hŏng dŭm boh klei huĭ tăm mâo, rơ̆ng klei êđăp ênang kơ mnuih ruă, phung mă bruă mdrao mgŭn, bi hrŏ tuič hnơ̆ng klei hmăi mơ̆ng klei ruă tưp truh kơ hdră ngă bruă mơ̆ng sang êa drao.“Mơ̆ng leh mâo mnuih ruă tal êlâo hĭn hlăm gưl bluh mâo klei ruă tal 4 anei, sang êa drao hluê ngă leh bruă ksiêm dlăng, hyuă kjăp hdră gang mkhư̆ klei ruă. Truh kơ ară anei, jih jang mnuih ruă hriê ksiêm mkă ăt msĕ mơh mnuih mơ̆ng êngao nao mŭt hlăm sang êa drao dưi dlăng msĕ si F0 kyua anăn brei rơ̆ng kjăp hdră gang mkhư̆ klei ruă tưp ti hnơ̆ng ktang hĭn mâo bruă hưn mthâo klei suaih pral lehanăn ksiêm dlăng hnơ̆ng hlơr asei mlei mbĭt anăn hluê ngă dŭm hdră gang mkhư̆ klei ruă tưp msĕ si truă čhiăm guôm ƀô̆, ksiêm dlăng hnơ̆ng hlơr asei mlei lehanăn dôk kbưi hŏng mnuih mkăn. Ară anei hmei mkŏ mjing leh lu anôk kăp ksiêm dlăng dơ̆ng mơ̆ng mmông nao mŭt ti sang êa drao lehanăn truh kơ mmông grăp čô ruă knŏng mâo 1 čô kăp kriê dlăng.

Bi ti Sang êa drao mdrao klei ruă Hnak lehanăn ruă Ksŏ – anôk dôk dŏng mdrao kơ 3 čô ruă Covid 19 ti Dak Lak, dưi hluê ngă kjăp klei kčah mtrŭn gang mkhư̆ klei ruă Covid 19 mơ̆ng bruă tŭ drông, dŏng mdrao mnuih ruă. Hŏng 3 čô ruă dôk dŏng mdrao, Sang êa drao kah mbha leh 4 êpul bi mlih tuôr mă bruă, grăp tuôr mă bruă mâo 3 čô aê mdrao; 2 čô nai mdrao lehanăn 1 čô đru bruă. Hluê anăn, phung aê mdrao srăng ksiêm dlăng kjăp dơ̆ng mơ̆ng mmông mnuih ruă mŭt mơ̆ng ƀăng jang čiăng kah mbha êlan nao ba bi ktlah.

Mbĭt hŏng anăn, hdră mdjiê kman wăl sang êa drao dưi hluê ngă nanao, djah djâo dưi kah mbha, ba msir mghaih djŏ hdră. Sang êa drao ăt hluê ngă kjăp klei kčah mtrŭn hlăm hdră ksiêm mkă, mdrao mgŭn klei ruă, klă klơ̆ng hlăk phung knuă druh bruă mdrao mgŭn mŭt hlăm sa adŭ čiăng čŭt čhum ao răng mgang lehkơnăn kơh nao ksiêm dlăng klei ruă, êdei kơnăn knuă druh mdrao mgŭn lŏ nao kleh čhum ao răng mgang ti sa adŭ mkăn čiăng ba mdjiê kman djŏ si klei kčah mtrŭn. Aê mdrao Châu Đương, Khua sang êa drao mdrao klei ruă Hnak lehanăn ruă ksŏ čar Dak Lak brei thâo:“Ară anei, sang êa drao kah mbha leh krĭng, êlan nao dŏng mŏng êlâo. Jih jang mnuih ruă, găp djuê mnuih ruă hưn mthâo s’aĭ klei suaih pral hŏng kdrăp Qrcode, tơdah hưn mthâo ƀuh đing, mâo klei bi knăl mơ̆ng klei ruă hmei srăng nao ksiêm dlăng adŭ mdrao mdê, iêu phung nai aê mdrao ksiêm mkă kman. Tơdah djŏ klei ruă hmei srăng ba nao ti anôk dŏng mdrao bi ktlah, tơdah amâo djŏ klei ruă hmei ăt dŏng mdrao lehanăn ba ti krĭng bi ktlah lŏ dơ̆ng hluê ngă hdră bi ktlah,.

Nay Phi La, Khua knơ̆ng bruă mdrao mgŭn čar Dak Lak brei thâo, čiăng bi hrŏ klei bluh mâo klei ruă hlăm anôk bruă mdrao mgŭn, Knơ̆ng bruă mdrao mgŭn mtă kơ dŭm Sang êa drao lŏ dơ̆ng hluê ngă klei kčah mtrŭn kơ Hdruôm hnơ̆ng čuăn Sang êa drao êđăp ênang hlăm hdră gang mkhư̆, mdrơ̆ng hŏng klei ruă tưp Covid 19 lehanăn dŭm klei ruă hlăm êlan bi êwa kjham hluê si klei bi mklă mrô 3088/QĐ-BYT hruê 16/7/2020 mơ̆ng Phŭn bruă mdrao mgŭn. Krơ̆ng kjăp bruă mkŏ mjing hluê ngă dŭm klei kčah mtrŭn kơ bruă ksiêm bi mklă, kah mbha, rơ̆ng hdră ksiêm dlăng, bi mdjiê kman hlăm sang êa drao, amâo lui klei ruă bluh mâo hlăm sang êa drao. Dŭm sang êa drao brei mkŏ mjing dŭm êpul bi kdơ̆ng pral, hluê ngă hdră tĭng dlăng dŭm boh klei huĭ tăm mâo, kah mbha krĭng bi ktlah djŏ si klei kčah mtrŭn. Nay Phi La brei thâo:“Anôk bruă mdrao mgŭn gĭt gai leh dŭm êpul êya brei čih mkra hdră ngă bruă mdê mdê mơ̆ng êpul bruă pô. Tal sa jing hdră bi ktlah grăp adŭ mdrao amâo dah bi ktlah dŭm boh sang dlông lehkơnăn mâo boh klei kjham hĭn jing srăng bi ktlah sang êa drao kyua anăn brei mâo djăp ênŭm mnuih mă bruă lehanăn rơ̆ng kơ hdră ksiêm mkă dlăng klei ruă êjai, gang mkhư̆ klei ruă êjai. Tinei mtă kơ grăp Anôk bruă mdrao mgŭn kdriêk ăt msĕ mơh dŭm boh sang êa drao brei mâo klei čih mkra kah mbha êpul mă bruă čiăng amâo hmăi truh kơ hdră ksiêm mkă dlăng, dŏng mdrao. Tal dua jing mprăp djăp ênŭm kdrăp mnơ̆ng ăt msĕ mơh kah mbha krĭng găn êrô, dŏng mdrao kñăm bi hrŏ tuič hnơ̆ng klei tưp lar hlăm sang êa drao.

Ară anei, Dak Lak mâo hlăm brô 80 čô mnuih dôk bi ktlah ti anôk bruă mdrao mgŭn lehanăn mklin sa anôk, giăm 1.800 čô mnuih bi ktlah ti sang. Hdră tui duah, čuăl krĭng, bi ktlah lehanăn dŏng mdrao dôk mâo anôk bruă mdrao mgŭn pŏk ngă kjăp kñăm rơ̆ng klei êđăp ênang, tŭ dưn. Hŏng dŭm klei gĭr mơ̆ng anôk bruă mdrao mgŭn lehanăn lehanăn klei hluê ngă kjăp dŭm klei kčah mtrŭn hlăm hdră gang mkhư̆ klei ruă tưp, Dak Lak srăng hrăm mbĭt hŏng kluôm ala čar hgŭm kngan msưh kdŭn klei ruă tưp, răng mgang klei suaih pral êpul êya yang ƀuôn./.