VOV4.Êđê - Anôk bruă gĭt gai gang mkhư̆ klei ruă Covid-19 čar Dak Lak mrâo mâo Hdră kčah kơ bruă đru mnuih ƀuôn sang Dak Lak mơ̆ng dŭm krĭng mâo klei ruă tưp mâo klei čiăng wĭt ti alŭ wăl kyua hmaĭ mơ̆ng klei ruă Covid-19.

Phung dưi mđing tal êlâo, mâo Êpul 1 jing phung mduôn khua, hđeh điêt, phung mniê ba tian, phung mniê rông anak điêt ti gŭ 36 mlan, phung nao ksiêm mkă, mdrao klei ruă, nao čuă găp djuê, nao mă bruă ka dưi lŏ wĭt, phung mă bruă jing gŏ êsei ƀun, giăm ƀun, mnuih mă bruă jing găp djuê phung mâo ai krŭ kdơ̆ng, mnuih mă bruă dưi dưn hdră đru yang ƀuôn grăp mlan; Êpul 2 jing phung mă bruă luič bruă mă; Êpul 3 jing hđeh sang hră, phung hriăm gưl prŏng lehanăn phung mkăn. Mĭn tĭng gưl drông mnuih ƀuôn sang tal êlâo srăng kčưm hlăm hruê kăm kơ anăp hŏng hlăm brô 5 êtuh čô mnuih. Knơ̆ng bruă mdrao mgŭn Dak Lak brei thâo, čiăng kơ bruă drông mnuih ƀuôn sang wĭt kơ alŭ wăl rơ̆ng êđăp ênang gang mkhư̆ klei ruă tưp, bruă ksiêm mkă srăng dưi hluê ngă tliêr kjăp.

H Zawut pô mblang