VOV4.Êđê -  Tlam hruê 16/6, ti ƀuôn prŏng Ƀuôn Ama Thuôt, Dhar bruă mặt trận čar Dak Lak lŏ tŭ mă prăk đru truh 1 êklai prăk mơ̆ng dŭm êpul êya, anôk bruă, mnuih hlăm alŭ wăl čar Dak Lak đru kơ keh blei vaccine lehanăn dŭm kdrăp mnơ̆ng yua hlăm bruă mdrao mgŭn kñăm gang mkhư̆ klei ruă Covid 19. Hluê anăn, bi ala Anôk bruă Sang čư̆ êa ƀuôn prŏng Ƀuôn Ama Thuôt jao leh 500 êklăk prăk, Anôk bruă pui kmlă Dak Lak êbeh 355 êklăk prăk, dŭm anôk bruă duh mkra ti ƀuôn prŏng Ƀuôn Ama Thuôt ăt jao giăm 200 êklăk prăk... Ênoh prăk mâo Dhar bruă mặt trận čar Dak lak tŭ mă truh 1 êklai prăk. Leh tŭ mă, Dhar bruă mặt trận čar Dak lak jao leh ênoh prăk anei kơ Keh vaccine ala čar mkăp kơ bruă blei vaccine lehanăn kdrăp mnơ̆ng yua hlăm bruă mdrao mgŭn kñăm gang mkhư̆ klei ruă Covid 19.

Trần Văn Thuận – Khua anôk bruă pui kmlă čar Dak Lak brei thâo, mđing truh kơ asăp iêu mthưr mơ̆ng Dhar bruă mặt trận čar Dak lak kơ bruă đru mguôp prăk blei vaccine lehanăn kdrăp mnơ̆ng yua hlăm bruă mdrao mgŭn gang mkhư̆ klei ruă Covid 19, phung khua anôk bruă lehanăn phung knuă druh, mnuih mă bruă hur har, jih ai tiê đru mguôp.

 “Mđing truh bruă hgŭm kngan gang mkhư̆ klei ruă Covid 19, jih jang phung khua kiă kriê anôk bruă lehanăn giăm 1 êbâo čô knuă druh, mnuih mă bruă hlăm anôk bruă đru mguôp leh sa hruê mă bruă čiăng đru mguôp. Jih jang hluê ngă s’aĭ. Ênoh prăk mâo đru mguôp êbeh 355 êklăk prăk, hmei jao kơ Dhar bruă mặt trận čar Dak Lak. Bruă anei bi êdah ai tiê đua klam mơ̆ng grăp čô knuă druh, mnuih mă bruă hlăm anôk bruă, bi êdah ai tiê hgŭm kngan hnưm msưh kdŭn klei ruă tưp.

Snăn, tĭng truh kơ ară anei, leh êbeh 1 hruê kăm mđing truh asăp iêu mthưr mơ̆ng Dhar bruă mặt trận čar Dak lak kơ bruă đru mguôp prăk blei vaccine lehanăn kdrăp mnơ̆ng yua hlăm bruă mdrao mgŭn gang mkhư̆ klei ruă Covid 19, mâo leh dŭm pluh êpul êya bruă, mnuih ti Dak Lak đru truh giăm 7 êklai prăk./.

H Nêč pô mblang