VOV4.Êđê – Aguah 11/6, ti să Ea Uy, kdriêk Krông Pač, bruă êdam êra čar Dak Lak mkŏ mjing Knăm trŭn ngă bruă êdam êra yan mdei prŏng thŭn 2021 hŏng lu bruă ngă yuôm njăn kyua êpul êya. Knăm trŭn ngă bruă êdam êra yan mdei prŏng čar Dak Lak thŭn 2021 dưi mkŏ mjing hŏng dŭm bruă ngă msĕ si: mphŭn rŭ mdơ̆ng 1 boh sang klei khăp leh anăn 1 tač pah boh, mkra mjing 1 km êlan klông kuč mngač êlan ƀuôn sang, mdup brei 30 hnư mnơ̆ng kơ gŏ sang knŭk kna dlăng ba mâo klei hdĭp dleh dlan, hâo hưn mtô mblang gang mkhư̆ klei ruă Covid- 19.

Ayŏng Y Lê Pas Tơr,  K’iăng khua bruă êdam êra čar Dak Lak brei thâo, mbĭt hŏng dŭm bruă mđĭ kyar bruă duh mkra - ala ƀuôn, mkŏ mkra krĭng ƀuôn sang mrâo, ƀuôn prŏng jăk siam; bruă ngă phung êdam êra Dak Lak hlăm yan mdei prŏng thŭn anei srăng kƀĭn đru kơ êpul êdam êra hgao klei dleh dlan kyua hmaĭ mơ̆ng klei ruă tưp, lŏ dơ̆ng mđĭ kyar hdră mphŭn čô kơ bruă hlăm êpul êdam êra ti alŭ wăl.

H Zawut pô mblang