VOV4.Êđê - Aguah mbruê 4/8. Čar Dak Lak ngă leh bruă tŭ drông 59 čô mnuih jing phung nao mă bruă ti ƀuôn prŏng Hồ Chí Minh wĭt kơ alŭ wăl lehanăn dôk ngă klei bi ktlah mbĭt djŏ hŏng hdră bhiăn. Dŭm čô anei jing mnuih mă bruă ti knơ̆ng bruă Worldon Việt Nam, ti anôk bruă tuh tia Đông Nam, kdriêk Củ Chi, ƀuôn prŏng Hồ Chí Minh mâo klei čiăng wĭt kơ alŭ wăl.

Čiăng mjing klei găl kơ dŭm čô anei mâo klei êđăp ênang wĭt kơ ƀuôn sang, ƀuôn prŏng Hồ Chí Minh gĭt gai leh dŭm anôk bruă ngă klei ksiêm mkă kman Sars CoV 2 hmar kơ dŭm čô anei. Êpul ksiêm dlăng anôk bruă tuh tia Đông Nam, kdriêk Củ Chi mbĭt hŏng knơ̆ng bruă Worldon Việt Nam dăp leh 3 boh êdeh mdiăng mnuih lehanăn 1 boh êdeh mdiăng êđeh êdâo wĭt ba jao kơ čar Dak Lak. Leh dŭm čô anei truh ti kban mrô 14 ti să Hòa Phú, ƀuôn prŏng Ƀuôn Ama Thuôt, êpul kahan ksiêm êlan klông nao drông lehanăn tăt êlan nao ti anôk bi ktlah mbĭt hlăm čar ti anôk dôk phung hđeh sang hră mơ̆ng anôk dôk kơ phung hriăm bruă lĭng kahan- sang hră gưl prŏng Lăn Dap Kngư.

Y Bel pô mblang