VOV4.Êđê - Hluê si Knơ̆ng bruă mdrao mgŭn čar Dak Nông, dŭm čô hlăm alŭ wăl tuôm bi mtuôm giăm hŏng 2 čô ruă Covid 19 ti ƀuôn prŏng Hồ Chí Minh mâo leh boh tŭ ksiêm dlăng gưl 1 amâo ƀuh ôh kman Sar CoV2. Êlâo anăn, leh mâo klei hâo hưn, pô ruă mrô 13.498 lehanăn 13.499 mơ̆ng ƀuôn prŏng Hồ Chí Minh nao ti čar Kon Tum găn alŭ wăl čar Dak Nông djŏ klei ruă Covid 19, bi tuôm giăm hŏng mnuih mă bruă ti Anôk bruă hrui prăk tăk êlan klông ti alŭ wăl čar Dak Nông. Anôk bruă mdrao mgŭn čar Dak Nông mjêč tui duah 10 čô bi tuôm giăm nao ksiêm dlăng kman lehanăn hluê ngă hdră bi ktlah mklin sa anôk kñăm ksiêm dlăng. Boh tŭ ksiêm mkă hluê Realtime-PCR, 10 čô anei amâo ƀuh ôh kman klei ruă leh gưl ksiêm dlăng tal 1. Ară anei, phung bi ktlah ăt suaih pral, êpul bruă mdrao mgŭn dôk ktuê ksiêm phung F2 čiăng ba bi ktlah djŏ si klei kčah mtrŭn./.

H Nêč pô mblang