VOV4.Êđê - Klei hâo hưn mơ̆ng Anôk gĭt gai hdră gang mkhư̆ hŏng klei ruă tưp ti mnuih čar Dak Nông, 12 čô bi tuôm hŏng pô ruă mrô 28474 ti kdriêk Krông Knô, amâo ƀuh kman klei ruă leh gưl ksiêm dlăng tal 1 hŏng hdră RT-PCR. Êlâo anăn, aguah hruê 11/7, čar Dak Nông čih yap leh mnuih ruă Covid 19 jing mniê, mrô 28474, dôk ti kdriêk Krông Knô, mrâo wĭt mơ̆ng ƀuôn prŏng Hồ Chí Minh. Leh mâo mnuih ruă, anôk bruă mdrao mgŭn čar Dak Nông pŏk leh hdră ksiêm dlăng, tui duah, ba bi ktlah, mă mta ksiêm dlăng kman. Hluê si boh tŭ ksiêm dlăng hluê hdră RT-PCR mta ksiêm dlăng mơ̆ng 12 čô bi tuôm giăm hŏng pô ruă amâo ƀuh kman Sar CoV2 leh gưl ksiêm dlăng tal 1. Ară anei, jih jang diñu ăt suaih pral, amâo mâo êngoh, mtŭk, dleh bi êwa lehanăn jih jang dưi ba bi ktlah ti anôk bi ktlah mklin sa anôk mơ̆ng kdriêk Krông Knô./.

H Nêč pô mblang