VOV4.Êđê - Knơ̆ng bruă mdrao mgŭn čar Dak Nông brei thâo, 13 čô F1 ti Dak Nông đĭ mbĭt gưl phiơr QH1403, hŏng mnuih ruă Covid 19 tal 3 mơ̆ng čar Dak Lak, đĭ mơ̆ng tač êdeh phiơr Nội Bài wĭt kơ tač êdeh phiơr Ƀuôn Ama Thuôt, mâo leh anôk bruă djŏ tuôm ba bi ktlah mklin sa anôk lehanăn gưl ksiêm dlăng tal 1 amâo ƀuh ôh kman klei ruă Covid 19. Hlăm anăn, mâo 1 čô F1 êlâo kơnăn nao leh ti ƀuôn prŏng Hồ Chí Minh ăt mâo anôk bruă mdrao mgŭn ƀuôn prŏng ba bi ktlah, ksiêm dlăng. Leh hmư̆ klei hâo hưn kơ mnuih ruă Covid 19 tal 3 mơ̆ng čar Dak Lak jing V.Đ.D đĭ êdeh phiơr mơ̆ng tač êdeh phiơr Nội Bài wĭt kơ tač êdeh phiơr Ƀuôn Ama Thuôt, dŭm anôk bruă djŏ tuôm ti čar Dak Nông pral čuăl krĭng, tui duah mnuih đĭ mbĭt hŏng pô ruă anăn, jih jang mâo 14 čô lehanăn pral ba jih jang F1 anei nao bi ktlah. Ară anei anôk bruă djŏ tuôm čar Dak Nông hlăk dôk čuăl krĭng, tui duah phung F2, F3 čiăng hluê ngă hdră bi ktlah hlăm wang 21 hruê djŏ si klei kčah mtrŭn./.

H Nêč pô mblang