VOV4.Êđê - Hruê 17/5, knơ̆ng bruă mdrao mgŭn čar Dak Nông brei thâo 4 čô mnuih đing mâo klei ruă tưp Covid-19 ti ƀuôn prŏng Gia Nghĩa amâo mâo ƀuh kman hlăm klei ksiêm mkă tal 2 hŏng kman Sars CoV 2. Êlâo kơnăn, leh mâo klei hưn mthâo kơ mnuih ruă mrô 3141 mâo klei ruă tưp Covid-19. Anôk bruă ksiêm dlăng klei ruă tưp čar Dak Nông mâo leh klei hâo hưn lehanăn ngă bruă tui duah dŭm čô mnuih mrâo wĭt mơ̆ng anôk mâo klei ruă truh kơ alŭ wăl. Leh mâo klei hưn mthâo, gŏ sang N.Đ.H (mâo 4 čô mnuih) dôk ti ƀuôn hgŭm Nghĩa Đức, ƀuôn prŏng Gia Nghĩa tuôm nao hlăm anôk mbĭt hŏng mnuih ruă mrô 3141, nao ti anôk bruă mdrao mgŭn hưn mdah bruă mdrao mgŭn lehanăn ba bi ktlah. Dŭm klei mă lehanăn ksiêm mkă kman tal 1 amâo mâo ƀuh kman ôh, ară anei ăt kăn mâo kman hlăm klei ksiêm mkă tal 2 hŏng klei ruă tưp Covid-19. Truh kơ ară anei 4 čô anei dôk mâo klei bi ktlah lehanăn ksiêm dlăng bruă mdrao mgŭn djŏ hŏng hdră bhiăn.