VOV4.Êđê - Kñăm gang mkhư̆ kman Sar CoV2 tưp lar hlăm êpul êya, čar Dak Nông gĭt gai leh dŭm êpul djŏ tuôm pral hluê ngă dŭm hdră msir ksiêm dlăng, bi ktlah mnuih mrâo wĭt mơ̆ng krĭng mâo klei ruă tưp kñăm gang mkhư̆ klei ruă Covid 19. Ti anôk gak răng Cai Chanh jing ƀăng jang tal êlâo mkŏ mŭt hlăm dŭm čar krĭng Lăn dap kngư: Êpul djŏ tuôm čar pral kah mbha mgrông êlan nao djŏ guôp, bi hrŏ tuič hnơ̆ng êdeh êdâo mjưh ktuê êlan kñăm gang mkhư̆ klei điă lar mơ̆ng kman klei ruă. Mbĭt anăn ksiêm dlăng kjăp mnuih bi ktlah ti sang hlăm alŭ wăl čar lehanăn hưn mthâo hŏng anôk bruă sang čư̆ êa čiăng mâo hdră kriê dlăng, bi ktlah djŏ guôp. Hluê si klei ksiêm yap mơ̆ng anôk bruă djŏ tuôm čar, mơ̆ng leh dŭm čar kwar Dhŭng hluê ngă hdră bi ktlah yang ƀuôn, grăp hruê kah knar mâo êbeh 5 êbâo čô đĭ êdeh p’phŭt wĭt kơ lăn dap kngư. Ti Dak Nông, dŭm hruê giăm anei ênoh mnuih mơ̆ng dŭm čar kwar Dhŭng wĭt kơ alŭ wăl truh giăm 1 êbâo čô./.

H Nêč pô mblang