VOV4.Êđê- Yap truh 13-7, čar Dak Nông mâo leh 3 čô ruă Covid-19 mrâo. Ti anăo klei ruă Covid-19 dleh ktuê dlăng, huĭ dah bluh mâo hlăm lu anôk, čar Dak Nông ba yua hdră bi ktlah kluôm čar hluê si Asăp mtrŭn mrô 15 mơ̆ng Khua knŭk kna mphŭn mơ̆ng 12 mmông hruê 13-7 êla truh mâo klei hưn mthâo mrâo. Hluê anăn, čar Dak Nông srăng mdei jih jang bruă bi kƀĭn lu mnuih mơ̆ng 20 čô kơ dlông. Amâo bi kƀĭn ôh mơ̆ng 10 čô mnuih kơ dlông êngao kơ anôk bruă knŭk kna, sang hră, sang êa drao, brei dôk bi kbưi ƀiă êdi 2m ti anôk lu mnuih. Bi hrŏ hnơ̆ng êrô êbat hlăm êlan klông, ênoh mnuih hlăm êdeh êdâo hlăm čar. Bi hrŏ ênoh mnuih hlăm anôk mă bruă, mđĭ mă bruă online. Hŏng phung mơ̆ng ƀuôn prŏng Hồ Chí Minh (ară anei dôk bi ktlah hluê si Asăp mtrŭn 16/CT-TTg) wĭt/ hriê ti čar: Brei mă mta ksiêm mkă Realtime PCR ti dŭm anôk ktuê dlăng klei ruă tưp, bi ktlah hjăn sa anôk êla mâo klei tŭ ksiêm mkă amâo djŏ klei ruă snăn bi ktlah ti sang leh anăn ksiêm mkă Realtime PCR hluê si klei kčah mtrŭn mơ̆ng Phŭn bruă mdrao mgŭn.

Pô mblang: H’Zawut Ƀuôn Yă