VOV4.Êđê- Tui hluê knơ̆ng bruă mdrao mgŭn čar Dak Nông, truh kơ ară anei, dŭm alŭ wăl dưi ngă leh klei tlŏ mgang vaccine Covid-19 gưl tal 1. Gưl tal 1 anei, čar Dak Nông dưi mâo êbeh 9.000 hnơ̆ng vaccine Covid-19. Čiăng kơ bruă tlŏ mgang mâo klei tŭ dưn, knơ̆ng bruă mdrao mgŭn čar Dak Nông ngă klei tlŏ mgang hlăm 8 anôk: sang êa drao prŏng ti čar lehanăn 7 anôk bruă mdrao mgŭn hlăm dŭm kdiêk.

Dŭm čô mâo klei tlŏ mgang gưl anei jing: knuă druh, phung mă bruă mdrao mgŭn, dŭm čô hlăm êpul gĭt gai, dŭm čô ba anăp hlăm bruă gang mhkư̆ klei ruă tưp Covid-19… Tui hluê hdră mtrŭn mrô 21 mơ̆ng knŭk kna. Knơ̆ng bruă mdrao mgŭn brei thâo, kluôm ala čar mâo 10.200 čô mnuih tlŏ leh aruăt tal 1. Leh klei tlŏ mgang mâo 1.700 čô mnuih mâo dŭm klei bi kdơ̆ng hŏng êa drao msĕ si: êngoh, ktal, ruă anôk tlŏ, blĕ ô̆ lehanăn amâo ƀuh ôh klei bi kdơ̆ng kjham. Ară anei dŭm čô leh tlŏ mgang mâo sơăi klei suaih.

Pô mblang: Y-Khem Niê