VOV4.Êđê -  Hruê mbruê (12/7), čar Dak Nông lŏ mâo sa čô mâo klei ruă tưp Covid-19 wĭt mơ̆ng ƀuôn prŏng Hồ Chí Minh. Mnuih ruă mrô 31 êbâo 604 jing amai C.T.Q, kkiêng thŭn 1966, dôk ti să Dak Wer, kdriêk Dak R’Lâp, čar Dak Nông. Tui si klei ksiêm mkă kman, hlăm brô 3 mmông aguah hruê 8/7, amai Q mưn êdeh đru mdrao mgŭn ba atăt ung jing P.T.T, kkiêng thŭn 1962, nao mdrao klei ruă ti sang êa drao Bình Dân (mrô 371 êlan Điện Biên Phủ, ƀuôn hgŭm mrô 4, kdriêk čar mrô 3, ƀuôn prŏng Hồ Chí Minh). Truh ti sang êa drao, dua čô ung mô̆ ngă klei ksiêm mkă hmăr kman ƀiă dah amâo mâo ƀuh ôh kman Sars CoV 2. Truh kơ 9 mmông mmăt hruê anăn mơh, amai Q lŏ mưn êdeh dŏng mdrao mdiăng diñu 2 wĭt kơ sang (ka thâo klă ôh pô mgăt êdeh anăn). Aguah hruê 9/7, amai Q nao ti anôk mdrao mgŭn să Ea Wer hưn mdah klei suaih pral lehanăn mâo klei mtă brei bi ktlah ti sang. Truh kơ 11 mmông krah mlam, anôk bruă ksiêm dlăng klei ruă tưp čar Dak Nông hmư̆ klei amai Q mâo klei ruă tưp Covid-19. Hlăm mmăt anăn mtam, êpul bruă mdrao mgŭn mă ba amai Q nao bi ktlah, mă mta ksiêm mkă kman, truh kơ 10 mmông aguah hruê 12/7 hlăm klei ksiêm mkă kman RT-PCR bi klă amai mâo klei ruă tưp Covid-19. Sơnăn truh kơ tlam hruê 12/7, čar Dak Nông mâo leh 3 čô mâo klei ruă tưp, dŭm čô anei jing dŭm čô wĭt mơ̆ng ƀuôn prŏng Hồ Chí Minh sơăi.

 Leh dŭm blư̆ čih yap mâo mnuih mâo klei ruă tưp Covid-19 wĭt mơ̆ng ƀuôn prŏng Hồ Chí Minh, čar Dak Nông mâo leh hdră mtrŭn mtô lehanăn tui ngă klei ksiêm mkă kman 3 blư̆ kơ dŭm čô mrâo wĭt mơ̆ng ƀuôn prŏng Hồ Chí Minh čiăng gang mkhư̆ klei ruă tưp Covid-19.

Y Ƀel pô mblang