VOV4.Êđê- Ti anăp klei hmăi mơ̆ng klei ruă Covid 19, anôk bruă lŏ hma čar Dak Nông mkŏ mjing leh êpul đru, bi hgŭm hlăm bruă hrui blei dŭm mta mnơ̆ng lŏ hma ti alŭ wăl. Êpul đru, bi hgŭm hlăm bruă hrui blei dŭm mta mnơ̆ng mâo Knơ̆ng bruă Lŏ hma mđĭ kyar krĭng ƀuôn sang čar Dak Nông mâo 15 čô. Êpul mâo bruă klam pŏk ngă, bi hgŭm hŏng dŭm kdriêk, ƀuôn prŏng pral ruh mtlaih, msir mghaih dŭm klei gun kpăk čiăng đru mtrŭt mđĭ bruă pla mjing lehanăn hrui blei mnơ̆ng lŏ hma rơ̆ng klei nanao đrông, gang mkhư̆ klei ruă Covid 19 kjăp.

Klă klơ̆ng, êpul srăng ksiêm yap, bi mklă klei gun kpăk, dleh dlan lehanăn klei akâo čiăng, ba mdah mơ̆ng phung ngă lŏ hma, pô đang war, anôk hrui blei, mkra mjing mnơ̆ng lŏ hma. Mbĭt anăn, bi klin klei hâo hưn, čih mkra hdră bi hgŭm mnuih pla mjing hŏng sang maĭ mkra mjing mnơ̆ng lŏ hma, anôk bruă ba čhĭ mnơ̆ng kơ ala tač êngao, anôk hrui blei, ba čhĭ. Ti čar Dak Nông, ară anei boh ƀơr lehanăn boh durian jing 2 mta boh kroh mâo ênhă pla prŏng dôk hlăm yan hrui êmiêt, khă snăn kyua hmăi mơ̆ng klei ruă tưp anăn bruă hrui blei tuôm hŏng lu klei dleh dlan./.

Pô mblang: H’Nêč Êñuôl